+19 °С
Дождь
СВО-со шкенан-влаклан полшена
13 Мая , 10:51
Обелиск воктеч эртыме годым вуетым савалте…
Кодший Акпарс ялыште Кугу Отечественный сарыште кредалше землякна-влак лӱмеш ыштыме обелиск воктене Чечняште да СВО-што вуйым пыштыше герой-влаклан шарнымаш баннерым пижыктыме ыле. Тений тушко эше иктым, СВО-што ӱмыр лугыч лийше Максим Мухаметшин лӱмеш, вераҥдыме.
Патыр рвезын лӱмжӧ калык чонышто ила. Авторын фотожо.
Максимлан шарнымаш баннерым вераҥдаш тудын йолташыже Андрей Саитов чот тыршен. Чыла пашам шке ӱмбакыже налын, кӱлеш материал-влакымат налын ямдылен, тудлан Денис эргыже да Дима шольыжо полшеныт. Металлоконструкцийым погаш сварочный оборудованийым Роман Габдуллин пуэн. Баннерым Уфа гыч геройын Сергей шольыжо ыштен колтен.
Максим Мухаметшин Акпарс ялысе шуко икшыван ешеш шочын. 2004 ийыште Акпарс школышто 11 классым тунем лектын. Вара Россий армийыште срочный службым эртен. Армий деч вара Туймаза олаш тунемаш пурен, электрогазосварщик профессийым налын. Пу дене пашам ышташ йӧратен, садлан эше тунемын, пушеҥгылан обработкым ыштыше станок-влакын 3-шо разрядан станочник лийын. Туймаза олаште илен да пашам ыштен. Ешым чумырен, икшыве-влакым куштеныт.
2024 ийыште Максим шке кумылын СВО-ш каен. Кредалмаште икмыняр гана сусырген. Чолгалыкым ончыктымыжлан тудым 2024 ий июньышто «За отвагу» медаль дене палемденыт. Боевой заданийым шуктымыж годым 2025 ий 4 январьыште патыр пӧръеҥын ӱмыржӧ кӱрылтын. Тудым Шаймуратов генералын да Мужество орден-влак дене суапландареныт.
«Ме Максим дене пошкудо лийынна, пырля модын кушкынна, ик классыште тунемынна. Тудо мыйын эн сай йолташем ыле. Максим нерген шарнымашым арален кодаш - тиде мыйын порысем», - кугешнен каласыш мыланем Андрей.
Поро пашам шуктымыжлан Андрей Саитовлан уло ял калык дене тауштена!
