СВО гыч толшо серыш

Сай да поро шонымо жапда лийже.

...Шкат паледа, мый СВО тӱҥалтыш гыч манме гаяк тыште улам. Ынде мондаш тӱҥалынам, мо тугай айдеме лияш... Вашке гыч икшывем-влакын мый дечем посна кугеммыштлан кум ий лиеш. Кум ий нуно мыйым фотошто да видеокыл дене (тудыжат уло гын) але отпускыш толмем годым гына ужыт. Отпускшат пеш кӱчык, нунын дене йӧнлын ойласенат огына шукто. Тау аваштлан, сайын воспитатлен кушта.

...Тыште шуко ужаш перныш. Ме тӱҥжӧ ешна, йолташна, пошкудына-влак верч тыршена. Шукышт шонат дыр: тыште «сай оксам» ыштен налына. Тидлан тыге каласем: паша окса дене огыл, жап дене висалтеш. Мыняр сай пашам ыштет - тунар шукырак илет. А пашам сайын ышташ манын, чот тыршыман. Пашадарем - тиде уто кечым илаш йӧн.

...Тендан дене сай. Мый монденам, мо тугай шыпыште малаш, мо тугай шуматкече, рушарня але пайрем, мо тугай асфальт корно. Йӱр ден тӱтыра - мыланна игече огыл, илыше кодаш шанс. Тендан дене вӱд пуч дене толеш, шокшо кочкыш, электротул, телевизор уло, эрла мом ыштышашым паледа, а тыште чыла ситуаций деч шога.

...Мый вуйым ом ший. Тыглай шонымашым кондаш тӧчем: сар шке ок пыте! Сеҥымаш кунам-гынат лиеш! Тудым лишемдаш пеш чот тыршыман. Тумарте ме тыште, лавыраште да йӱштыштӧ ава-ачана, ватына, икшывына, шочшына-влак верч чот тыршышаш улына. Шке пашанам наградылан верч огына ыште. Тендан илышда, мемнан еш илышна, элнан илышыже ынышт вашталт, тошто гаяк кодышт манын тыршена.

…Тыште мыланна тендан мемнам шарнымыда пеш чот кӱлешан. Мыланна палыман да шижман: шеҥгелнына - яра вер огыл, а шарнен, аклен да вучен илыше еҥ-влак. Мӧҥгыштӧ плакатысе герой-влакым огыл, илыше, чонан еҥ-влакым вучат. Тиде кылым кӱрлаш ида пу. Мемнан нерген шарныза. Мыланна возыза. Шочмо кундем гыч шке йылме дене возымо серышым налаш, «Пашада кузе кая?» манмым лудаш - кугу куан! Тыглай илыш нерген каласкалыза - свежа кинде пуш могай, йоча-влак мом ыштылыт, кӧ ила да кӧ уке улеш. Тиде мыланна - тыглай мут гына огыл, а илыш. Тугай илыш, кудыж верч ме чытена, орланена да кучедалына…

Российлан чап! Честь имею! Чеверын. 

P.S. Серышым возаш огеш кӱл. Отпускыш толмекем ойласена.