-5 °С
Пылан
Все новости
СВО-со шкенан-влаклан полшена
11 Ӱярня , 11:21
Пырляште - вий!
Тиде калыкмутым пеш сайын умылена. Ныл ий утла каен шогышо СВО-што улшо салтакна-влаклан вуйнам савена. Нунылан кертме семын эре полшаш ямде улына.
Сетьым пидаш погынышо ӱдырамаш-влак. Авторын колтымо фото.
Март тӱҥалтыште маскировочный сетьым пидме пашанам уэш тарватышна. Тиде пашалан ялысе библиотекын пашаеҥже Зоя Баязова вуйын шога да сомылжым моштен виктара. 16-18 ÿдырамаш, СДК-ш погынен, рÿж пашалан пижна. Паша коклаште муралтенат колтышна. «Муро дене паша куштылгын шукталтеш» оят ушыш тольо. Пашанам куштылемдаш станокат полшыш. Валентин Абдуллинлан кугу таум ойлена. Тудын мастар кидше дене ямдылыме станок пашанам ятырлан ончык колтыш. Ончыч сетьым пидаш лента-влакым вашкӱзӧ дене пÿчкеден ямдылыме гын, кызыт «спанбонд» манме материал рулоным станокеш пижыкташ да иканаште ятыр лентым пÿчкын лукташ лиеш. Шонымашет уло гын, «Илыш чылаланат туныкта» оят чын улмаш. Сеткым, лентым, шнурым, спанбонд материалым налаш окса дене полшышо ял калык да тӱрлӧ кундемлаште илыше землякна-влаклан пеш кугу тау. Чылаже 100 утла маскировочный сетьым пидме. Кызыт гуманитарный полыш дене пырля колташ 13 сеть ямде. Ял калык дене пырля тыгай полышым 16 гана шуктымо.
В. Абдуллин ямдылыме станокшо воктене.
Сетьым пидмаште.
Школын коллективше гуманитарный полышым погымо акцийыш ушнен.
Шаймуратов лӱмеш рӱдерыш намийыме гуманитарный полыш.
Туныктышо, школ пашаеҥ, тунемше да нунын ачашт-авашт гуманитарный полышым чумырымо акцийыш ушненыт. Нуно кÿчык жапыште носким, перчаткым, футболкым, термобельём, мушмо да моло кӱлешан арверым, вашке пужлыдымо кочкышым поген кертыныт. Тунемше-влак салтак-влаклан чон гыч лекше серышым возеныт. Ачашт-авашт 14300 теҥгем, туныктышо да школ пашаеҥ-влак 13000 теҥге окса полышым чумыреныт. Тиде шийвундо дене кÿлеш сатум налын, 13 коробкым темен, февраль мучаште Мишкан селасе Шаймуратов лÿмеш рÿдерыш намиен коденыт. Вашке специальный военный операцийын каен шогымо верлаш намиен шуктат. Тидын дене школ коллектив волонтёр толкыныш чолган ушнымыжым шке примерже дене сайынак ончыктен. Тыгай годым Шочмо элым йӧратымаш, икте-весылан полшымаш, порылык, келшен илымаш ончылно улыт да йоча-влакым воспитатлымаште кугу верым айлат. СВО-лан полшымо сомыл калыкым иктыш уша. Салтакна-влак таза-эсен коштышт. «Мландÿмбалне тыныс илыш лийже» шонымаш кажнын чонышто ила.
Ме ÿшанена: мемнан полышна, поро пашана салтак-влакын кумылыштым нӧлталеш, вийыштым ешара, илышыштым мыняр-гынат куштылемдаш полша. Икоян лиймаш - илышыште эн шерге. Пырляште - вий! Тыныс илыш кажнылан шерге.
Новости партнеров