Поро паша калык чоныш шыҥа

Пайрем касым Тымбай сельский поселенийым вуйлатыше Д.Д. Янгубаев почын. Ты мероприятий патриот шӱлыш, койыш, шочмо эллан ӱшанле да икоян улмо нерген каласкален. Залыште улшо салтаклан, нунын родо-шочшыштлан чын эрге да патыр салтак-влакым ончен куштымыштлан тау мутым ойленыт. Кызыт ача-коча-влакын суапле пашаштым мемнан рвезына-влак специальный военный операцийыште шуктат. Нуно тачысе жапын геройжо улыт. Илыш корнышт - кушкын толшо тукымлан сай пример. Ончылныда чылан вуйнам савена!

Пайремым сӧрастарыше Тымбай школын мурышо ансамбльжын, клубын «Изэҥер» вокальный да «Рвезылык» куштышо коллективше, Кульчубай ялын «Ший оҥгыр», Измар ялын «Пеледыш» ансамбльже-влакын да моло самодеятельный артист ден мурызо-влакын мурымышт-куштымышт ончаш толшо-влакын кумылыштым савырен. А кузе мастарын Тымбай ӱдыр-эрге-влак почеламутым каласкалат! 4-ше классыште тунемше Салима Ибатова «Мы говорили с мамой о войне» почеламутым чонжо вошт колтен лудын пуэн. Мероприятийын эн изи участникше, куд ияш Богдан Ишмурзин Макс Майнын «Сеҥымаш» почеламутшым пеҥгыдын, товатлыме семын каласкален, шокшо шижмашым да келге шонымашым ылыжтен. Ростислав Петровын йоҥгалтарыме «Мой папа сейчас на войне» почеламутшо колыштшо-влакын шинчавӱдыштымат луктын, вет тудын ачажат, Игорь Петров, кызыт сарзе улеш. 

Сар! Кӧ тиде шучко мутым шонен луктын? Мыняр самырык чоным тудо шке помышышкыжо налын. Мыняр вӱр йоген, мыняр салтакын ӱмыржӧ лугыч лийын. Мыняр еш, мыняр йоча шочде кодыныт...

Сценыште шогышо ача-ава-влакын шинчавӱд дене куптыргалше чурийышт, ойгеш чалемше вуйышт залыште шинчыше-влакын шӱмыштӧ каласен моштыдымо шижмашым тарватен, но нигӧ, нимо нунын ойгыштым куштылемден ок керт. Специальный военный операцийыште Тымбай кундем гыч 9 салтакын - Д. Яметовын, С. Якушевын (Тымбай ял), М. Байрамовын, С. Имакаевын (Кульчубай ял), Г. Кадиятовын, В. Янгильдинын, А. Ильмурзинын (Измар ял), С. Сидоровын, Р. Яндубаевын (Токтар ял) рвезе ӱмырышт кӱрылтын. Таче ме нуным порын шарнена да, тыгай мероприятий-влак сеҥымашым лишемдаш полшат манын, пеҥгыдын ӱшанена. Вет чынак, кунам коклаште келшымаш, умылымаш уло, чыла шукташ, чытен лекташ лиеш. Тымбай калык тидым шке примерже дене раш ончыктен. Ял калыкын, школын, клуб-влакын, администрацийын, мер организаций-влакын, оргкомитетын икоян, пашаче улмышт, пашам организоватлен, вӱден моштымышт сай лектышым пуэн.

«Ӱстел поян огыл гын, йылмет поян лийже» манме калыкмут уло. Тымбай калыкын чылажат поян: тӱрлӧ-тӱрлӧ сий дене ӱстел йол лывырга, ныжылгын мурен, ойлен колтымыж дене чонет кана, шокшо, поро кумылышт дене ойгет шула. Тиде ганат тыште кажне толшым тӧр уна семын вашлийыныт.

Ял калыклан, толшо уна-влаклан, пайремым эртараш полшышо-влаклан поро мутым каласена. Суапле пашада ончыкыжат сайын вораныже. Поро паша вӱдыш ок кай - тудо калык шӱмыш шыҥа!