23 февраль - Ачамландым аралышын кечыже. Илышыжым армий дене кылден

Игорь П. илышыжым Россий армий дене кылден. Бирск район Кужнур ялын шочшыжо службым 2011 ий июнь тылзыште призыв почеш Алкино военный частьыште эрташ тÿҥалын. Ик ий гыч контрактым возен да Самара областьысе Рощинск военный олаш куснен, ту жап гыч службыжо мотострелковый бригада дене кылдалтын. Ятыр вере командировкышто лийын. 2014 ийыште Крым Республикын Российыш «пӧртылмыж» годым тушто кум тылзе сарзе порысшым шуктен, тудым «За возвращение Крыма» медаль дене палемденыт. Тыгак кум гана Таджикистан мландыш командировкыш миен. 

Шуко гана Астрахань областьысе Капустин Яр селаште ученийыште лийын. Икманаш, салтак илыш тыгай: кушко йодыт, тушко колтат, кушто кÿлеш, тушто полшыман.  

СВО тÿҥалме годым сержант Игорь П. взвод командирын полышкалышыже лийын. 2022 ий 9 февральыште черетан командировкыш каен да тушеч Украин мландыште тÿҥалше специальный военный операцийыш ушнен. Пел ий гыч отпускыш толмеке, октябрь-ноябрь тылзыште мобилизоватлыме-влакым Казань олаш тунемаш колтеныт. Кум тылзе гыч адакат шкенжын служитлыме йолташыже-влак деке СВО кайыме верлаш пӧртылын. 

Сар нигӧм да нимом ок чамане. Игорь П. 2024 ийыште контузитлалтын, но йолÿмбалнак лийын, таблетка да укол полшымо дене эмлалтын. Йолжо сусыргымеке, тудлан икымше полышым пуэныт, но Игорь кучедалме пасу гыч каен огыл. Сар шке шучкылыкшым ончыктенак шога. Игорят увер деч посна йомшо, тыгак колышо-влакын спискыште лийын. Шуко гана ешыж дене кыл йомын. Тыгай увер-влакым пален налаш ешлан кугу чытымаш кÿлын. 

Ик ий ончыч вашлийын мутланыме годым шижалтын: тудо Россий армийын ÿшанле салтакше улеш. Шочмо элым йӧрата, пырля служитлыме йолташыже-влакым пагала, кеч-могай жапыштат полшаш ямде. Нигунам неле, йӧсӧ манын ойлен огыл. «Тушто мыйым йолташем-влак вучат. Тÿҥалме пашам мучашке шуктыман» манын ойлымыжо-влак ушеш шыҥеныт. Военный формыжым «За боевые отличия», «За воинскую доблесть», «Участнику специальной военной операции», «За участие в военном параде в ознаменование 75-летия Победы в Великой Отечественной войне 1941-1945 гг» медаль-влак сӧрастарат. 2022 ий 25 июльышто Россий Федерацийын Верховный главнокомандующийже В.В. Путин командованийын боевой заданийжым, сарзе порысым сайын шуктымыжлан Тауштымо серыш дене палемден. 

Тыгай неле жапыште салтаклан еш - кугу эҥертыш да эн ÿшанле тыл. Мальвина ватыже пелашыжын кумылжым нӧлталын мошта. Шуко малыдыме йÿдым эртарен гынат, сай ончыкылыклан, сеҥымашлан ÿшаным ок йомдаре. Ныл ий жапыште, мÿндыр корным ончыде, шкеак машина рульым виктарен, пелашыж деке лу гана Украин мландыш миен коштын. Кажне гана гуманитарный полышым намиен. Пытартыш гана тушко Ростислав эргыж дене шыже каникул годым миеныт. Салтакын ватыже семын Мальвина В. тÿрлӧ проектыш ушнен: тиде «Жёны героев», «Мы молимся за тебя» да молат. «Катюша» лÿман хорым чумыреныт, тушкат мураш коштеш. 8 классыште тунемше Ростислав эргыштат потриотизм шÿлышан кушкеш. 2 класс гыч юнармеец-влак отрядын еҥже улеш. Тÿрлӧ конкурслаште вийжым терга, эре сеҥыше радамыш логалеш. Кугеммеке, ачаж гай военныйын корныжым ойыраш шона. 

...Игорь П. отпускыш толын кайымыжлан ик ият эртен улмаш. Могай куан: йӧратыме пелаш, ача тиде кечылаште  кӱчык отпускыш толын!  Игорь П. пеҥгыде тазалыкым, ешыж деке таза-эсен, сеҥымаш дене пӧртылаш тыланена.

Теве тыгай лÿддымӧ улыт Российын салтакше-влак. Шочмо элнам, тыныс илышнам аралат. Сӧй пасулаште, неле-йӧсым чытен, сеҥымашым лишемдыме, сай илыш верч кучедалыт. Кеч-могай жапыштат нунын тÿҥ эҥертышышт - еш. Тек кажне еш пиалан лиеш. Тек вуй ÿмбалнына чевер кече шыргыжеш, кава яндар да канде лиеш.