«Салтаклан чон шокшынам пӧлеклена»

Актуган школын кугурак класслаште тунемше ӱдыр-рвезыже-влак салтак-влаклан специальный военный операций кайыме верлаш колташ окопышто, блиндажыште кучылтмо сортам ыштен ямдыленыт. Калай банке-влакым нуно теле каникул годымак погеныт, парафинжым интернет гоч заказатленыт. Материалым поген ситарымеке, туныктышышт Н.В. Апканиева дене пырля труд урокышто рӱж пашалан пижыныт. Тӱшка вий дене кызытеш кум яшлык сортам ямдыленыт. Тылеч посна йоча-влак марий йылмым туныктышышт С.Г. Мухамадиева да руш йылмым туныктышышт С.А. Юмаева дене пырля салтак-влаклан поро тыланымашан серышым возеныт.

Тыгай гуманитарный полышым лишыл жапыште СВО кайыме верлаш наҥгаяшлан райрӱдыш колташ каҥашеныт. «Тек тиде сорта-влак салтаклан нелылыкым сеҥаш полшат, серышна-влак шӱм-чонжым ырыктат», - ойлат йоча-влак.