Отпускыш толшо салтак дене вашлиймаш

Салтак «Акпарс» волонтер клубышкат унала пурен лекте, вет школ коллектив да волонтёр-влак СВО-лан гуманитарный полышым поген колтымаште кугу пашам шуктат. Роман волонтёр-влак дене шукертак палыме - нуно ятыр гана тудлан лӱмлымӧ посылкым колтеныт.

Вашлиймашлан чот йывыртышна. Ӱстел коклаште мутланыме годым ой почеш ой лекте. Тыге Роман нерген шукырак пален нална. Пӧръеҥ 2022 ий сентябрь годсек частичный мобилизаций дене СВО кайыме верыште служитла, стрелок улеш. Тудым «Участнику специальной военной операции» да «За воинскую доблесть 2 степени» медаль-влак дене наградитленыт. 

Кызыт салтак ешыж дене олаште ила, Аделя пелашыж дене кок йочам куштат. Йӧн лийме годым Акпарсыш аваж ден акаж деке толын коштыт. 

Мутат уке, салтак-влакын кӱчык отпуск жапыште лишыл еҥышт дене пырля лиймышт шуэш, но меат нунын дене вашлиймашым вучена, элнам аралыше-влаклан утларакше мо кӱлмым пален налнена. «Гуманитарный полышым эре намиен шогат, тендан пидме маскировочный сеть-влак пеш кӱлешан улыт, посылка дене колтымо шокшо носки, вургем, мӱй, шудо чай да молат шочмо кундемым шарныктат», - куанен ойлыш Роман.

Акпарс ял калык СВО-што улшо пӧръеҥ-влаклан тӱрлӧ семын полша. Поснак маскироватлалтме сеткым шуко пидыт. Тиде ганат ужатымына годым салтакым яра кид дене ышна колто: кок ямде сеткым да посылкым пуэн колтышна.

Чеверласыме годым землякна, ӱдырамаш-влакым шокшын ӧндалын, салтак-влаклан полшымыштлан, пеҥгыде тыл улмыштлан тауштыш. Меат чылаштлан лишыл жапыште ешышкышт таза-эсен пӧртыл толаш тыланен кодына.