Вич салтак лӱмеш - вич канде кож

Тыге ялче-влак ончыкылык Шарнымаш аллейлан негызым пыштышт. Нине тале сарзе-влакын лӱмышт: Антон Альбертович Айтиев, Игорь Николаевич Байбатыров, Денис Леонидович Таюшев, Руслан Семёнович Абрамов, Кирилл Игоревич Байбатыров. Кажне кожын ончыланже да шеҥгеланже тыгак йошкар пызле вондым шындышна, саварлан меҥге-влакым шогалтышна. Кожым специальный военный операцийыште лийше сарзе-влакын пелашышт, авашт-ачашт, шочшышт шке кидышт дене шындышт. Канде кожым Стерлитамак оласе питомник гыч налын толаш БР Кугыжаныш Собранийын - Курултайын депутатше Ф.Р. Шайхетдинов полшыш. Шындышаш верым погынен, каҥашен ӱдырамаш-влак палемдышт. Ончыкыжым кажне кож пелен, курымешлан шарнаш кодшо манын, патыр салтакна-влакын лӱмыштым возен шогалтынена.