Мӱндыр мландыш гуманитарный полышым намиен

Ончыч инженерно-саперный войскаште служитлен. Кажне кечын боевой заданийым шукташ логалын - вер-шӧрым мина деч эрыктеныт. Май тылзыште миномёт лӱйкалымаш йымак логалын, йолжо чот сусырген. Вара эше кум гана сусырген, госпитальыште эмлалтын. Марий рвезе моткоч ответственный да ӱшанле, лӱддымӧ, Шочмо элжым йӧратыше салтак улеш. Боевой йолташыже-влак олмешат заданийым шукташ ямде. Лӱддымылыкым да патырлыкым ончыктымыжллан патыр сарзым «За отвагу» ден «За отличие в специальной военной операции» медаль-влак дене наградитленыт. Марий пӧръеҥ чап кагаз, медальлан огыл, а чон йодмо почеш порысшым шукта. 

Реабилитаций деч вара частьышкыже пӧртылын, экскаваторщик сомылым шукта, окоп да блиндаж-влаклан мландым кӱнча.

…Кызытсе пуламыр ятыр пӧръеҥым ешыже, родо-тукымжо, йолташыже-влак деч шуко меҥгылан ойырен. Тале салтакын пелашыже Изольда Геннадьевна кумшо гана СВО кайыме верлаш миен толын. Икымше ганаже пӧръеҥжым отпуск деч вара Украина чек марте намиен коден, умбакыже Шаймуратов лӱмеш отряд дене ужатен колтен. Сентябрьыште да октябрьыште тушко шке машинаж дене кок гана гуманитарный полышым - тӱрлӧ арверым - намиен. Тусо сӱретым шке шинчаж дене ужын. Лӱддымӧ ӱдырамаш дене мутланаш Наратасты ялыш лӱмын мийышым. «Пелашем контракт дене служитлаш кайымыж нерген каласыш. Тунам СВО нерген уверым утларак шымлаш, эскераш тӱҥалынам. Тидлан кӧра ятыр рвезын чын пӧръеҥ, Шочмо элым аралаш ямде, патриот улмыжым умыленам. Южыжо вет, тӱрлӧ амалым муын, шылыт… Элнан историйжым келгынрак шымлымеке, кызыт СВО молан кайымым сайын умылем. Тушто пелашна, иза-шольына, ачана, чӱчÿна-влак, тӱнямбалне тыныс илыш лийже, осал ынже шарле манын, талын шогат. Нюслен шинчен, шинчавӱдым йоктарен полшаш ок лий. Тыште икте-весылан полшыман, салтак-влаклан ӱшаныман, нуным йӧратымынам тӱжем меҥге кокла гыч шижышт манын тыршыман. Тидлан шкеат пеҥгыдемынам. Мый сеҥымашым молын семынак моткоч вучем да ӱшанем: мемнан геройна-влак тыныслыкым кондат да мӧҥгышт илыше пӧртылыт. Пелашемын пӧртылмыжым шӱм-чон вургыж, йӧратен вучем. Тушто улшо кажне салтаклан вуем савем», - каласыш Изольда Геннадьевна.

Тудо тыгак поро еҥ-влакын СВО-што улшо салтак-влаклан полшаш кумылан улмыштлан тауштыш. Мичуринск школ коллектив тӱрлӧ семын полшаш тырша: гуманитарный полышым, вургемым поген, тӱрлӧ кочкышым ямдылен колтен. Базгия ял гыч шуко маскировка сетьым пидыныт. Йоча-влакын серышым возымыштым поснак палемдыш. Пелашыжын ойлымыж почеш, тыгай серыш-влак салтак-влакын боевой шӱлышыштым нӧлтат, сеҥымашыш шуаш полшат.

СВО-со салтакын отпускшо улыжат кок арня шуйна. Ты жапым кузе эртарымышт нергенат йодыштым. «Кок арня пелашемлан лӱйкалыме йӱк ок шокто, снаряд ок пудешт, лишыл еҥ-влак пелен улыт. Пиалан илышым илаш эше мо кӱлеш? Отпуск годым кажне шагатын, минутын, секундын шергакан улмыжым аклаш тунемынам», - ойла Изольда Геннадьевна.

СВО пытыже, салтак-влак ава-ача, пелаш, иза-шольо, ака-шӱжар, икшыве-влак деке таза-эсен да сеҥымаш дене пӧртылышт! Тӱнямбалне тыныслык лийже.