«Шкенан-влакым огына кудалте!»

«Тиде тыгай икымше кугу мемориал. Тудо элнам аралыме годым вуйыштым пыштыше, кызыт передовойыште кредалше да тылыште салтакна-влаклан полшаш вийыштым иктыш ушышо еҥ-влаклан пӧлеклалтын. Памятникын девизше - «Шкенан-влакым огына кудалте!». Пытартыш ийлаште тиде шомак мемнам пырля чумыра. Башкортостан чынжымак шкенжын-влакым ок кудалте. Уло республика рвезына-влакын илышыштым куштылемдаш, нунылан полшаш, мӧҥгышт илыше да таза-эсен пӧртылышт манын тырша», - каласен Башкортостан Вуйлык Радий Хабиров. 

Мемориалым ыштыме роскот 21 миллион теҥгеш шуын. Композицийын авторжо-влак - И. Макарова ден М. Батаев. Комплексын пырдыжшын проектшым А. Злищев ден Г. Мельников ямдыленыт. Памятникын кужытшо 12 метрыш, скульптур композицийын кӱкшытшӧ 3,1 метрыш шуыныт, материал шотеш бронзым кучылтыныт. Мемориалын пырдыжешыже кӱшкӧ чоҥештыше турня-влакым ончыктышо плита-влакым вераҥденыт - специальный военный операций пытымеке, тушан колышо сарзе-влакым лӱмыштым палемдат. Шола велне салтак-влаклан серышым возышо да окопысо сортам ямдылыше йоча-влакым, маскировко сетьым пидше ӱдырамашым, тыгак гуманитарный грузым темыме коробка-влакым ончыктымо. Пурла плиташте, тылын полышыжо дене палдарыме семын, - маскировко сеть дене авыралтше блиндажысе салтак. Композицийым «Шкенан-влакым огына кудалте!» девиз иктыш ушен шога. Скульптур композицийыште специальный военный операцийын кум участникшым -  мобилизоватлыме салтакым, кадровый военныйым да шке кумылын кайыше сарзым - ончыктымо.