Ял калык чоҥымо материалым СВО-ш колтен

Военнослужащий-влак район администрацийын вуйлыкшо деч блиндаж ден траншейлам чоҥаш пиломатериалым йодыныт. Командир-влакын йодмыштым шуктен, Шаран районын вуйлатышыже М.З. Ахмадуллин лишыл жапыште полшаш сӧрен.

Икмыняр кече гыч Херсон область гыч Россий Вооруженный вийын кок КамАЗ-ше кӱлеш материал-влаклан толынат шуын. Грузым ужатен намияш мемнан район гычак «Опер» позывноян сарзылан ӱшаненыт. Тудо 2023 ий годсек СВО-што контракт дене службым эрта. Кӱлешан полышым кӱчык жапыште Нурей сельский поселенийыште ямдыленыт. Тыште илыше марий калык СВО-ш икана веле огыл пиломатериалым колтен. Тиде ганат верысе предприниматель-влак да калык чолган ушненыт. Писын гына погынен, тӱшка вий дене пиломатериалым ямдыленыт. Кок кече жапыште 30 кубометр оҥам, брусым да пырням машинаш оптен колтеныт.

Еммет ял гыч предприниматель Геннадий Саитов 10 кубометр, Нурей ял гыч Ринат Арысланов 6 кубометр оҥам пуэныт. Изимка ялыште илыше Виктор Гайсинат 6 кубометр оҥажым чаманен огыл. Янахмат ял гыч Климентий Сыртланов шкенжын пилорамыштыже СВО-лан 1 кубометр оҥам да 3 кубометр брусым шелын ямдылен. Кӱлеш пырня-влакым Нурей ял гыч Венер Арысланов пуэн. «Нурей сельский поселенийын калыкшат, администрацийжат моткоч чулым улыт, нунылан кугу тау. Тӱшка вий дене ситышашлык да кӱлешан материалым погышна», - уло кумылын тауштен грузым ужатен наҥгайыше землякна.  

«Мемнан ялсоветыште илыше калык СВО-лан тӱрлӧ йӧн дене полшаш ямде. Сеҥымашым лишемдаш манын, предпринимательна-влак иканат ӧрдыжеш огыт код. Мый нунылан эре таум ойлем. Тыгай ура чонан, поро кумылан еҥ-влаклан кӧра салтакна-влаклан кӱлешан арверым колтен, моло семынат полшен кертына», - кугешнен ойла Нурей сельсоветын вуйлыкшо Олеся Атнагузина.