Йочам умылет гын веле тудлан йолташ лийын кертат

Ираида ден Тимур Минликаевмытын шке шочшышт кугу улыт. Кугурак Георгий эргышт 2022 ий годсек специальный военный операцийыште порысшым шукта. Тушко мобилизаций дене логалын. Младший лейтенант, взводын командирже улеш. Аваже-ачаже тудын дене кугешнат. Эргыштым кугыжаныш награда-влак дене палемденыт, оҥыштыжо Жуковын медальже да «Участник СВО» медаль йылгыжыт. Пелашыже Йошкар-Олаште ила. Минликаевмытын изирак Саша эргышт ешыж дене Октябрьский олаште ила. 

- Кузе те йоча-влакым ончаш налаш лийында? - йодым Ираида деч.

- Георгий ден Саша эргына, кушкын шуын, олаш кайышт. Шке илышышт дене илаш тӱҥальыч. Мыланна йокрок лие. Пелашем дене ик ӱдырым ончаш налаш каҥашышна, приемный еш семын документ-влакым погаш тӱҥална. Шаран селасе опека пӧлкаште адресым пуышт, кушко да кузе йодын мияш умылтарышт. Ме Мичуринск селасе йоча приютыш кайышна. Тыге ешышкына Гульшат логалын, тунам тудо 8 классыште тунемеш ыле. Ӱдырна 2010 ий декабрь тылзе гыч Мешер школышто тунемаш тӱҥале, 10-11 классым Акпарсыште тунем лекте. Школ деч вара Туймаза педучилищыште шинчымашым погыш, физкультурым туныктышо дипломым нале, - куанен ойла Ираида. 

Кызыт Гульшат марлан лектын, кок икшыван ава улеш. Пелашыже СВО-што контракт дене служитла. Гульшатлан Шараныште пачерым пуэныт. Кок икшывыже йочасадыш коштыт, шкеже бассейныште тренерлан ышта - йоча-влакым ияш туныкта.

- 2013 ийыште Гульшатын темлымыж почеш уэш приютыш кайышна. Радмила ден Русланым, акаж ден шольыжым, налын толна. Ончыч каныш кечылан гына шкенан деке налын толынна. Тыге икшыве-влак мемнан деке эркын-эркын тунемыныт. Январь тылзе гыч акаж ден шольыжо ешыштак илаш тӱҥальыч. Тунам Радмила 3 классыште, Руслан 1 классыште тунемыныт. Икана воктекем толын шогальычат, «Лиеш, ме тыйым «авай» манаш тӱҥалына?» пелештышт. Изишт годсек «авай» маныт. Коктынат уш-акылан, мутым колыштшо кушкыч. Кажне йочан чонжым, шонымашыжым умылет гын веле тудлан йолташ лийын кертат. Йоча-влак икгай огытыл. Туге гынат нуным ойыркалаш ок лий, - эртышым шарналта Ираида.

Радмила Мешер школ деч вара Октябрьский оласе шуко профилян колледжыште технологлан тунем лектын, кондитер улеш. Ӱдырлан туштак пачерым пуэныт. Руслан Октябрьский олаште автомеханиклан тунемын. Кодший июньышто армийыш каен. Хабаровск олаште танкын механик-водительжылан служитлен.

Июнь мучаште Минликаевмыт ешыште чылан пырля погыненыт. Туге пӱрен дыр, ик жапыштак Георгий эргышт отпускыш, а Руслан армий гыч мӧҥгышт пӧртылыныт. Тудо кечын чылан ава-ачан суртыш вашкеныт, икте-весым ужаш чумыргеныт.

Эн тӱҥжӧ - тушто шокшо еш шӱлыш озалана. Айдеме еш деч посна вождымо пушеҥге гай улеш. Ик приютат, ик йочапӧртат икшывылан ешым вашталтен ок керт. Минликаевмыт кум йочалан шкеныштын шокшыштым да йӧратымашыштым пуэныт. 

Гульшатын, Радмилан да Русланын кажныжын шке илыш историйже. Но нуным ик пӱрымаш ушен шога: нуно изинек еш деч посна кодыныт, приютышто иленыт, а вара у ешым муыныт. Тыгай еш нунылан Минликаевмыт еш лийын.

Ираида ден Тимур Минликаевмытын шкеныштын кок шочшышт да ашнаш налме кум икшывышт уло. Тыгодым ава-ача нуным «шкеныштынлан» да «йотлан» огыт ойыркале. Чылаштымат йӧратат да пагалат. 

- Икшывыда-влаклан мом тыланеда? - йодым шуко икшыван ава деч. 

- Сай илыш-корнышто коштышт, шкеныштым шке ончышт. Ава-ачаштым ынышт мондо, эре куандарен шогышт. СВО-што улшо эргына-влак ешышкышт таза-эсен пӧртылышт, нуным Юмо саклен кондыштарыже. Чылаштланат пиалым да тазалыкым тыланем.