Пӧртылташ ок лий. Мондашат ок кӱл...

Февраль тӱҥалтыште кастене Денисын СВО-ш каяш ямдылалтмыж нерген уверым колын, эрдене ужаташ мийымеке, тудо «Мыйым нигӧ каяш тулартен огыл, СВО-ш шке кумылын каяш лийым» манын каласыш. Шинчаончалтышыже шыргыжын гынат, ешыже, ялже дене чеверласаш неле лийын. Пелашыже, кок ӱдыржӧ да эргыже ончылно шорташ огыл манын, шкенжым кучен. Паленам: Денис нимогай нелылык ончылно пулвуеш сукен ок шич. Могай-гынат корным кычал муын, эре сеҥен лектын. Тиде ошкылжат чын лийын, шонем. Денис ден Вероникан ешышт пиалан ош йӱксӧ-влакын ешыштым ушештарен. Нунын ваш йӧратен ончалтышыштышт порылык, ныжылгылык, ваш пагалымаш, илышлан куанымаш шижылтыныт.

«Апрель тӱҥалтыште увер деч посна йоммыж нерген уверым налмеке, шым ӱшане. «Денисем ила, тудо тыге кенета каен ок керт. Ила!» - шкевуя кычкырен чонем. Май тылзе мучаште военкоматын еҥже, толын, пелашемын геройла колымыж нерген каласымекат, ӱшанен омыл. Ме вет пиалан лийынна, кузе тыге?» - йодышым пуэнам шкаланем. «Денисым поезд дене кондат» увертарымашым налмеке, кум икшывемым поген, «Ачада пӧртылаш лектын» каласышым. Нунын кумылышт нӧлталте, пиалыштым шылтен кертде куанышт. Ачаштым вученыт, уке лиймыжлан ӱшанен кертын огытыл. Кумыньыштымат ӧндальымат, шинчавӱдым йоктаренак, ятыр шортым», - каласкалыш Вероника пелашыже.

...Ужаташ калык шуко погыныш. Ойго чылаштымат: шочшыжым, йолташыжым, палымыжым - Денисын шочмо суртышкыжо чумырен. 38 ий - пеледме пагыт, илаш да илаш ыле. Шочшыжын, лишыл еҥжын, пошкудыжын илышыштышт кеч-могай йӧсӧ лийын гынат, тудо эре полшаш вашкен, садлан полшашат тудын деч йодыныт. Паленыт: Денис полша, кидым ок лупшал. Кунам пошкудем аварийыш логалын, эн ондак тудын деке йыҥгыртен. Нимом ончыде, вӱраҥше чӱчӱжым пелйӱдым машинаш шынден, райрӱдыш, вашкеполыш станцийыш тарванен. Яркеево селаште сусыргышым налын огытылат, вигак 60 километрым Дӧртыльӧ олаш кудалын. Кузе да могай правилым пудыртен - тидын нерген огына ойло (вич штраф толын), тӱҥжӧ - намиен шуктен, вигак операцийым ыштыме ӱстелыш пыштеныт. Эрдене каласеныт: «эше ик-кок шагатлан варашрак кондеда ыле гын, утарен огына керт ыле…» Але кок шагат йӱдым, пошкудыжын вӱтаже йӱлымым ужын, калыкым чумырен. Пожарный-влак толын шумеш, тулым йӧртеныт, пожар умбакыже шарлен огыл… Пошкудо рвезым арален, тудым обижаяш толшо-влакым поктен колтен. Тыгайже Денисын илышыштыже ятыр лийын. Пашажым (кеҥежым комбайныште ыштен) лийже манынак шуктен. Эре ончыл верыште лийын. Шочмо ялжым йӧратен, арулыкшо, моторлыкшо верч тыршен. Ялыш пурымо корным куштыра деч эрыктен, шудыжым солен. Виталий эргыжымат тыгаяк лияш туныктен. 

Денис Леонидович еҥ дене келшен моштен. Тудо келшымашым аклен, садлан илымыж годымат йолташыже шуко ыле. Пытартыш корныш ужаташ, ешыжын ойгыжым лош ыштен, ятыр еҥ миен. Тачысе кечынат, Вероника деке пурен, чаманымашыштым каласен каят. СВО гыч шольыж дене чеверласаш толшо Валерий изаже, чон шортын, шольыж дене кугешнымыж нерген каласыш. Денис ешыжым, Зина акаже ден Дима курскажым, Валера изаже ден еҥгажым пагален, ваш миен толын, аклен, ваш полшен илыш… Ужаташ БР Кугыжаныш Собраний - Курултайын депутатше, район администрацийым вуйлатыше, военкоматын, Илиш районысо «Боевое братство» мер ушемын, Илиш МТС-ын, «Племзавод «Урожай» ООО-н еҥышт, Старокуктово тичмаш школ гыч туныктышо-влак, миен, чаманыме мутыштым каласышт. «Мондашат, пӧртылташат, кеч-мыняр йӧсӧ гынат, ок лий. Эре ушыштына, чоныштына лият, Денис. Лӱметым ялысе памятникеш возен кодена», - каласыш верысе администрацийым вуйлатыше Р.М. Мубараков. Чеверын, Денис. Узьмакыште кошт, кийыме мландет пушкыдо лийже...