Российын салтакше-влаклан вуйнам савена

Бурай селаште илыше Абликовмыт ешлан ик жап илыш чарнымыла чучын. 2023-шо ий нунын ешышкышт кугу ойгым конден. Галина Ивановна ден Виталий Апаевич мобилизацийыш логалше Эдик эргышт да контракт почеш служитлыше Стасик шольыштын колымышт нерген уверым налыныт. Тиде эн шучко, эн неле да ÿшанаш лийдыме ойган увер лийын. 

Эдуард Витальевич Абликов 1987 ий 2 январьыште шочын. 2004 ийыште Бурай селаште 1-ше кыдалаш школым тунем пытарен, вара Уфа оласе Экономика да сервисын кугыжаныш академийжым йошкар диплом дене тунем лектын, специальностьшо - организацийын менеджерже. 2009 ийыште Москваште Россий МВД-н войскаштыже службым эртен. Ава-ача служитлыме верже гыч кок гана тауштымо серышым налыныт. Армий деч вара шкенжым илышын тÿрлӧ шӧрыныштыжӧ терген ончен. Ик жап буритлыме компанийыште бурильщикын полышкалышыжлан тыршен, тиде жапыштак Уфасе нефтяной университетыште заочно шинчымашым поген. Банкын менеджержылан тыршен. Спорт денат пеҥгыде кылым кучен. Школышто тунеммыж годым ече дене вийжым терген гын, варарак парашютный спортлан шӱмаҥын. Парашют дене тӧршташ икмыняр гана лÿмын Уфа олаш миен коштын. Пÿрымаш Сочи олашкат наҥгаен, тушто футбол дене FLFA Федерацийын кубокшын лӱдыкшыдымылык шотышто специалистын сомылжым шуктен. 

2022 ий сентябрьыште элнан увертарыме мобилизацийыш логалын, снайпер лийын служитлаш тÿҥалын. Эдуард Абликов боевой заданийым шуктымо годым 2023 ий 12 мартыште вуйжым пыштен. Тудлан улыжат 36 ий веле лийын, пӧртым чоҥен, ешым чумырен илаш да илаш веле ыле… Но шучко сар нигӧм ок чамане. Ме палена, тудо геройла вуйжым пыштен. Поро кумылан, пашаче, лÿддымӧ, ава-ачажлан да чыла палымыжлан шочмо элым да илышым йӧратыше самырык рвезе лийын кодеш. Кугыжаныш тудын подвигшым кÿкшын аклен: Мужество да генерал Шаймуратов лӱмеш орден-влак дене палемден. Бурай селасе икымше номеран школын фасадыштыже Эдуард Витальевич Абликов лÿмеш сакыме мемориал оҥа мÿндырк волгалтеш. Самырык рвезе пÿсӧ шинчаж дене ончыко онча да пуйто «Ме садак сеҥена! Чыла сай лиеш!» манын каласынеже. Ава-ача эргыштын тиде ойжым ÿмыреш шарнен илаш тÿҥалыт.

Станислав Иванович Якушев 1976 ий 3 июньышто кугу ешеш шочын (кандашымше икшыве). Школышто тунеммыж годымак ойыртемалтше койышан лийын: книгам шуко лудын, пÿсӧ уш-акылан рвезе кушкын. Кугуракым, йолташым пагален моштен, мутым пуэн гын, шукташ тыршен, шкенжын шонымыж деч нигунам кораҥын огыл. Тынбай кыдалаш школ деч вара, 1994 ийыште, Уфа оласе речной училищыш тунемаш пурен. Служитлаш жап шумеке, академический отпускым налын, порысшым шукташ каен - Москвасе воздушно-десантный войскаште службым эртен. Армий деч вара «судостроитель-судоремонтник» специальность дене училищым тунем лектын. Дипломан пашаеҥ элнан тÿрлӧ организацийлаштыже тыршен.  Ик жап Виче эҥерыште сатум шупшыктышо теплоход дене коштын. Ульяновск олаш илаш куснымеке, ешым чумырен, Данил эргыжлан коло ныл ий. Пытартыш жапыште Краснодар крайысе Ивановка станцийыште илен, йӱдвелне пашам ыштен. СВО тÿҥалмеке, ӧрдыжеш кодын кертын огыл - 2022 ий 21 июньышто контрактым подписатлен, десантно-штурмовой батальонышто служитлаш тÿҥалын. Кок гана сусырген, госпитальыште эмлалтмеке, уэш стройыш шогалын. Боевой заданийым шуктымо годым 2023 ий 3 августышто колен. «Ме огыл гын, кӧ?», «Мемнан деч моло нигӧ!» шомакше-влак Галина акажын чонешыже келге кышам коденыт. Илыш гыч кайымекыже, Станислав Якушевым Мужество орден да Суворовын медальже дене палемденыт. 

Теве тыгай патыр эрге-влакым ончен куштеныт марий ешлаште. Вуйыштым пыштыше самырык рвезе-влак ава-ачан чонышто ÿмыреш илаш тÿҥалыт. Кугу ойгым чытен лекташ кӧргӧ вий, родо-шочшын, пошкудын, кугыжанышын полыш кидышт, ой-каҥашышт пеш кÿлешан. Герой-влак огыт коло, нуно шарнымаште илаш тÿҥалыт. Ме нунын ончылно вуйнам савена да тыныс илышлан ÿшанен илена.