Поро пашаже ок мондалт

Тудым шарнен, пагален, шкеныштын да ӧрдыж ялла гычат калык курымашлык корныш ужатыме митингыш ятыр толын ыле. Курултай депутат, район да верысе администраций вуйлатыше, ял калыкат мутыштышт тудын чын верч лӱдде шогымыжым, шочмо ялжым йӧратымыжым, кумда чонан улмыжым, илышым йӧратымыжым палемдышт. 

62 ияш ӱмырыштыжӧ пиалан жапшат, ойганжат - чыла лийын. Но тудо нигунам вуйым сакен, илышлан ӧкынен илен огыл. Анач да Андреевка кыдалаш школлаште тунеммаш, Совет Армий радамыште служитлымаш, ял озанлыкыште, нефтяниклан тыршымаштат, моло вереат шке сомылжым тӱрыс шуктен ыштен. 1995-1996 ийлаште контракт почеш Таджикистаныште служитлен, боевой действийын ветеранже улеш. СВО тӱҥалмеке, Шочмо элжым йӧратыше айдеме уэш кредалаш каен. 2023 ий сентябрь гыч 2024 ий декабрь марте штурмовик лийын. Штурмовой группа дене ятыр неле, лӱдыкшӧ заданий-влакым шуктен. Шочмо эл ончылно пуымо присягылан эре ӱшанле кодын.

Алексей Анатольевич шочмо кечыже марте арня илен шуктен огыл. 2024 ий 27 декабрьыште неле кредалмаш годым геройла колен. Чеверласыме митинг деч вара ял калык, ака-шӱжарже-влак, марий йӱлам шуктен, патырышт дене чеверласышт. Узьмакыште кошт, Алексей. Поро пашат нигунам ок мондалт!