-23 °С
Пылан
Все новости
СВО-со шкенан-влаклан полшена
11 Апрель 2025, 14:33
Герой-влак огыт коло, нуно шарнымаште илат
Мишкан селаште самырык герой-влакын фотографийыштым вераҥдыме икмыняр баннерым ужаш лиеш. «Медиацентр «Молодые Герои Республики» проектым БР Вуйлыкын грантше почеш илышыш шыҥдарыме. Тиде программын тÿҥ шонымашыже: кундемыштына илыше кажне еҥ, чурийыштым ончен, шке землякыштым шарнен да пагален илышаш. Нуно тыныс илыш верч, мемнан ончыкылыкна верч вуйыштым пыштеныт. Самырык-влак дене пашам намийыше районысо комитетын тÿҥ специалистше О.П. Биктубаева тиде пашам моштен виктара.
Авторын фотожо.
Уремыште Иван Романович Каншаевын фотожо мÿндыркӧ коеш. Тудо боевой заданийым шуктымыж годым 2022 ий декабрьыште ЛНР мландыште вуйжым пыштен. Россий Президентын указше почеш тудым Мужество орден, Башкортостан Вуйлыкын пунчалже почеш Шаймуратов генералын орденже дене палемденыт.
Вес баннерым спорткомплексын зданийыштыже вераҥдыме. Марсель Фадисович Ахматзянов - СВО-н участникше, Российын национальный гвардий войскажын оперативный назначениян отрядыштыже службым эртен. Ефрейтор Марсель Ахматзяновым «Генерал А.П. Ермолов», «Участник военной операции в Сирии», 3-шо степенян «За отличие в службе», «Участнику специальной военной операции» медаль-влак, «За отличие в службе в особых условиях» оҥеш пижыктыме знак дене палемденыт. 2023 ий октябрьыште Херсон областьыште боевой заданийым шуктымо годым вуйжым пыштен.
Ирсай могырыш кайыме корнымбалне Финат Индусович Гайнановлан баннерым вераҥдыме. РайПО-н ончычсо зданийыштыже Илья Олегович Бикмурзинлан, ДЮСШ-н зданийыштыже Владимир Валерьевич Пашкинлан баннер-влакым ужаш лиеш. Тиде зданийыштак тале ечызе, Башкортостан Республикын чемпионжо да призёржо Марсель Леонидович Байрамовлан баннерым пижыкташ шонат. Герой-влакын фотошт дене пырля тушто нунын военный илышышт дене кылдалтше уверым ужаш лиеш. Каласен кодыман, южо баннерым сарзе-влакын родо-шочшышт шкеак ямдылаш кумылаҥыныт.
В.Г. Янгильдин. Еш архив гыч налме фото.
Аптека зданийыште мартыште вераҥдыме баннерат мÿндырк койын кеча. Тиде поро пашам шуктымаште Мишкан администраций вуйлатышын икымше алмашты-шыже Л.Г. Александрован надырже кугу. Измар ялын эргыже, Тынбай школын выпускникше, армий генерал В.Ф. Маргелов лÿмеш Рязаньысе гвардейский высший военно-десантный училищын выпускникше, гвардий лейтенант Василий Гаврилович Янгильдин военный присягылан ÿшанле улмыжым ончыктен (Тудын нерген «Чолман» газетын 2019 ий 16 январьысе номерыштыже «Изинек десантник лияш ямдылалтын» статьям савыктыме). Василий Янгильдин - 2019-ше да 2020-шо ийлаште Москваште Йошкар площадьыште эртыше Сеҥымаш парадын участникше. Школышто, училищыште тунеммыж годымак кирым нӧлтен, тӱнямбал таҥасымашлаште вийжым терген, спорт мастерыш кандидат нормативым темен. 1-ше курсышто тунеммыж годым «Эн сай курсант» лӱмым сулен налын, кокымшо курсышто младший сержант, отрядын, вара взводын командирже лийын.
В.Г. Янгильдин Вера пелашыж дене. 2023 ий. Еш архив гыч налме фото.
В.Г. Янгильдин Йошкар площадьыште эртарыме Сеҥымаш парадлан ямде. Москва. 2019 ий.
2023-шо ийыште военный училищын выпускникше Ульяновск олаште службым эрташ тÿҥалын. Кеҥежым марий сÿан гÿжлен, ешым чумырен, Чорай ÿдырым - Вера пелашыжым - пеленже наҥгаен. Вера Сергеевнат Вася семынак спорт дене пеҥгыде кылым кучен, куштылго атлетика дене кок гана Российын чемпионжо лийын, спорт мастер улеш. Тудо ийыштак октябрьыште Василий Янгильдин гвардейский десантно-штурмовой дивизийын разведывательный взводшын командирже лиеш. 2024 ий 11 августышто специальный военный операцийыште задачым шуктымо годым вуйжым пыштен. Российын офицерже В.Г. Янгильдиным «За отвагу» медаль да Мужество орден дене палемденыт.
В.Г. Янгильдин кокымшо гана Сеҥымаш парадыште. Москва. 2020 ий.
Самырык улыт гынат, марий сарзе-влак военный пашаште кугу опытышт улмым, лÿддымылыкым ончыктеныт, элнан интересшым аралымаште патырлыкышт дене ойыртемалтыныт. Ме нуным шарнен да пагален илышаш улына. Герой-влак огыт коло, нуно шарнымаште эре илаш тÿҥалыт.
Новости партнеров