Сетьым пидына, газетым лудына, спорт дене кылым кучена

Ял группыштына увертарымеке, окса полышым погымашке ятыр еҥ ушныш. 4-ше апрельлан 56000 теҥге окса погынен. Ял калык деч посна ӧрдыж кундемлаште илыше землякна-влакат, пошкудо У Тынбай ял гыч икмыняр еҥ эре чолган ушнат. Эн ончыч маскировка сетьым пидме пашанам умбакыже шуяш каҥашышна (Ончычат ятыр сетьым пидын, посылкым поген колтымо). Оксам погымо, отчётым ыштыме, сетьлан материалым заказатлыме пашалан библиотека пашаеҥ Зоя Баязова вуйын шога. Кум кечыште тиде пашаш 33 ÿдырамаш ушнен. Икымше кечын 16, кокымшо кечын 22 еҥ чумыргышна, 7 сетьым пидын ямдылышна. Кодшо оксаж дене госпитальыш колташ вургемым, сарыш колташ медикаментым да моло кÿлешым налын, посылка-влакым ямдылена. Сеҥымашым лишемдаш мемнанат могай-гынат полышна лийже, тыныс илышнам аралыше салтакна-влак таза-эсен коштышт манын шонена.

Сетьым пидме пагытыште, погынен, чайым йÿашат, ял илыш нерген мутланашат, «Чолман» республикысе газетыште возымо статья-влакым лончылашат жапым муына (снимкыште). Марий ешыште марий газетым лудмаш, подпискым ыштымашын кÿлешлыкшым умылымаш - шочмо калыкнан йылмыжым, йÿлажым, ончыкылыкшым арален кодымашын ик ойыртемже. 

Тӱшкан погынен, тÿрлӧ пашам шуктымо деч посна спорт дене кылым кучышо-влакат ялыштына ятырын улыт. Илалше-влак скандинав йӧн дене коштмо спортым ойырен налыныт. Нылыт гыч шым шагат марте тÿшкан погынен эртыше-влакым вашлияш лиеш. Ик кечын, сетьым пидмаште каҥашымек, марий вургемым чиен, тазалыкыштым пеҥгыдемдаш лекташ шонымыштым увертарышт.  Мотор шошо кечын 7-8 километрым эртымышт нерген ойлышт. «Таза капыште - таза шÿлыш», - кугезына-влак таклан огыл тыге ойленыт.