Изаж дене кугешна

Алексей Александрович Абхаликов 1994 ий 14 январьыште Шаран селаште шочын. Куд ий теммеке, Усола ялысе школыш куанен ошкылын, тушто икымше гыч шымше класс марте шинчымашым поген. Индешымше классым Акпарс школышто тунем пытарен. Изи годсек куржталаш, тӱрлӧ модыш дене модаш йӧратен, спортлан шӱман лийын: телым ече дене коштын, кеҥежым футбол дене модын. Индешымше класс деч вара Уфа оласе речной училищыш тунемаш пурен, но икымше курс деч вара тушеч каен. Кок ият пеле Шаран СПТУ-што тракторист-водительлан тунемын. Училищыште тунеммыж годым курэш кучедалмаш дене заниматлен. Таҥасымашлаште эре призёр лийын, альбомыштыжо шуко Чап грамот ден дипломжо аралалтыт.

2012-2013 ийлаште армий радамыште шуаралтын, Свердловск областьысе Елань олаште сухопутный войскаште служитлен, БМП-2-н водительже лийын. Вара Самара олаш кусареныт, тушто кугурак снайпер лийын. Армий деч вара строительный кевытыште продавец-консультантлан ыштен. 

2017 ийыште ешым чумырен, пелашыж дене ӱдыр ден эргым ончен куштат, Свердловск областьыште Заречный олаште илат. Пытартыш ийлаште вахте йӧн дене Якутийыште монтажниклан тыршен.

Украин мландыште спецопераций тӱҥалмеке, 2022 ий июньышто Алексей  контрактым подписатлен, доброволец семын сарыш каен. Кызыт салтакын оҥыштыжо 2-шо степенян «За храбрость» да «За отвагу» кок медаль чолгыжыт. Чыла наградымат тудлан Москваште кучыктеныт.

У ий вашеш Алексейым черетан отпускыш колтеныт. Тудо ешыж дене Усолаш унала толын каен. 2025-ше ийым ава-ачаже, шольо-шӱжарже-влак дене пырля погынен вашлийыныт. «Кугу ешна - мемнан поянлыкна. Еш мемнам иктыш уша, тыште тыныслык, йӧратымаш, чытымаш да пагалымаш озаланат. Южгунам коклаште умылыдымаш лиеш гынат, кажнына шкенам кышкарыште кучаш тыршена. Мый тыгай ешыште илымемым пиаллан шотлем. Мыйын ешем - мыйын вий-куатем! Тудо мылам нимо деч шерге», - манеш шуко икшыван ава.

Арина шӱжарже Алексей изаж нерген шымлымаш пашам возен. Чӱчкыдын телефон дене мутлана, шуко уым пален налеш. «Мый изам дене кугешнем. Тудо командир улеш. «Мый шке калыкемым, ешемым, лишыл еҥем-влакым аралаш шочынам», - манеш. Аванан чонжо шке эргыже верч моткоч вургыжеш. Мыланна шинчавӱдшым ок ончыкто гынат, кажне гана йышт шортеш. Тек изанам Юмо да суксыжо аралат, тек тудо вашке сеҥымаш дене пӧртылеш», - кугешнен ойла Арина шӱжарже.