СВО-лан полшымо шотышто Башкортостан молыланат пример улеш

Шкенан-влаклан фронтышто полшена. Башкортостан шкенжын салтакше-влак верч азаплана, гуманитарный полышым чӱчкыдын колтылеш. СВО-што улшо-влакын ешыштлан чыла шотыштат полшат - фронтышто тидым сайын палат. Башкирийын фронтлан да салтак-влаклан полшымыжо элыште ик эн сайлан шотлалтеш, тидым военкор-влакат палемдат. 

2022 ийыште ме СВО-ш гумконвойым элыште эн ончыч колтышна (чылаже 144 лийын). Тылеч посна предприятий, муниципалитет, ура чонан еҥ-влак республика мучко передовойыш кӱлешан арвер-влакым погымо посылкым колтылыт. Донбассыш ик районын вуйлыкшат шке землякше-влак деке мийыде кодын огыл. Гуманитарный полышым салтак-влак деке шуктымо шотышто Башкортостанын шке паша ойыртемже уло: ЛНР-ыште мемнан логистический рӱдерна пашам ышта, тушеч полышым йодмаш почеш да кушко кӱлеш, тушко колтат. Врачна-влак черет дене СВО-ш салтак-влакым да верысе калыкым эмлаш мият, тушко передовойыштак пӱйым эмлаш лийме стоматологий модульым наҥгаеныт. Ӱдырамаш-влакын отрядышт военный госпитальлаште пашам ыштат, сусыргышо-влакым эмлат.

Тылыштат нунын нерген огына мондо. СВО-н салтакше-влак да нунын ешышт тылыште 40 тӱрлӧ утла полыш дене пайдаланен кертыт - тиде санаторийлаште тугок эмлалтмаш, йоча-влакын образованийышт, южо налогым тӱлыдымаш, суртысо тӱрлӧ йодышым решатлаш полшымаш да молат. Радий Хабиров илышыште тиде йодыш кузе шукталтмым шкеак эскера, тудо икмыняр гана спецопераций кайыме верлаш миен, передовойышто лийын, тургыжландарыше йодышыштым шотыш кондашлан салтак-влак дене чӱчкыдын мутлана. 

Контракт служба. Контракт службыш налме, тыгак калык дене патриотизм шӱлышан умыландарыме сомылым ворандарыме шотышто Башкирий молыланат пример улеш. Мобилизационный ямдылалтмашым сай кӱкшытыштӧ шуктымашат пуламыр деч кораҥаш полшен. Доброволец-влак кокла гыч Салават Юлаев, Шаймуратов генерал, Александр Доставалов лӱмеш башкир батальон-влакым, «Башкортостан» мотострелковый полкым чумырымо. 

Салтак-влакым тыныс илышлан ямдылена. Республика СВО-н салтакше-влакым тыныс илышлан адаптацийым эрташ ямдылалтмылан тӱткышым ойыра. Тыште «Защитники Отечества» фонд кугу пашам шукта. Оборона министрын алмаштышыже, кугыжаныш фондын вуйлатышыже Анна Цивилеван мутшо почеш, Башкирийыште тиде фондын пашажым ворандарыме опытым (рӱдерын филиалже-влакым иканаште икмыняр олаште почмаш) моло кундемлаштат шараш тӱҥалыт. Башкирийыште тыгак «Время героев» федерал проектым ушештарыше «Герои Башкортостана» кадр программым илышыш шыҥдарат. Тудлан эҥертен, СВО-што лийше салтак-влак кокла гыч предприятийлаште, организацийлаште, кугыжаныш кучемын органлаштыже пашам ышташ квалификациян вуйлык-влакым ямдылаш шонат. Тушко ушнаш икымше арняштак 1000 еҥ йодмашым пуэн.