Оҥай еҥ дене вашлиймаш

Тудо погынышо-влакым «Шогалына» сӱрет выставкыж дене палдарыш да тудым ямдылыме нерген тыгерак каласкалыш: «Эн ондак тӱҥалме латныл усталык пашамым ик шӱлыш дене ямдыленам. Донбассыште кушшо йоча-влакым ужын, шӱм-чонем моткоч вургыжын: тыге нине сӱретем-влакым возаш кумылаҥым. Кажне художникын шке умылымашыже: мыят картинылаште тӱняужмашемым почын пуэнам. Эше ялыштем илыше калык СВО-што улшо салтак-влаклан полша, тидым шке шинчам дене ужынам. Тыге патриотизм шӱлышан сӱретем-влак шочыныт. Мый марий калыкын шочшыжо улам, садлан тудын тӱвыражым да йӱлажым почын ончыктышаш улам. Картинем-влак лач тидын нерген каласкалат. Сӱретлаштем шевронымат ужыда. Тудын тушто кузерак койшашыжым мый шке шонен луктынам, вара эргым компьютерный графикыште келыштарен. Тушто геральдикын чыла йодмашыжым шуктымо. Шевроныш Россий ден Башкортостанын флагыштым ешарыме. Мыйын шонымаште, нине марий шеврон-влак рвезына-влакым аралат». 

«Ефрем Емельянович Калимьянов - ӧрыктарыше айдеме. Сӱретше-влак чонеш логалше улыт», - палемдыш райсоветын депутатше В.А. Сабиров. Туныктышо Г.Н. Иванова кидмастарын школышто тунемме жапше гыч онай тат-влакым ушештарыш. Ефрем Емельянович, пагален, тудлан лӱмын ямдылыме аралтышым кучыктыш. Йоча-влак почеламутым каласкалышт. Школын филиалжым вуйлатыше И.В. Айгузина вашлиймашыш толшо уна-влакым тунемше-влакын ямдылыме изирак пӧлекышт дене куандарыш.