Шӱм йодмо почеш…

17 февральыште СВО кайыме верлаш салтак-влаклан погымо окса дене налме УАЗ автомобильым ужатышна. Тудын дене пырля гуманитарный полышым колтышна. Ончыч тушко полыш семын «Rowoss» зарядный станцийым колтенна ыле. Рвезе-влак тауштен йыҥгыртеныт. СВО-ш колтымо полышым ужын, эн ондак уло вий дене фронтлан полшаш тыршыше поро чонан еҥ-влак верч кугешныме кумылым шижат. «Пырляште - вий!» - тиде тыглай шомак огыл, тиде уло кумыл дене шуктымо полыш. 

«Шкенан-влакым огына кудалте!» ой маядык-влакым эре ончыко ӱжеш. Нуно кочкыш-йӱышым, шокшо вургемым, мушкылтмо арверым да мемнан рвезе-влаклан полшаш моло кӱлешан сатум погеныт. Чыла тиде гуманитарный полышым СВО-ш шке наҥгаеныт. Тидлан кум еҥым сайленыт. Нуно машинам фронтыш намиен коденыт. Ялсовет вуйлатыше А.И. Ишалин тыге палемдыш: «Маядык-влак, тендан полышда моткоч шергакан. Фронт дене тыл пырля улыт! Пырля ме виян улына! Пырля ме садак сеҥена! Россий, ончыко!»