Россий салтак лÿддымӧ, йӧсым чытыше да Шочмо Элым йӧратыше улеш

Жап пеш писын эрта: теве теле, теве шошо, кеҥеж, шыже… Тыге Николай, Мишкан районысо Тынбай кыдалаш школышто шинчымашым налмеке, 2017 ийыште Самара оласе кӱртньыгорно колледжыш тунемаш пурен. 2021 ийыште дипломан специалистлан паша верым веле кычалаш кодын, но ныл ий военный олаште илымыже да курскажын сарзе пашам шуктымыжо Николайын кумылжым савыреныт, чонжо контрактым подписатлаш ÿжын. 

2021 ий 11 ноябрьыште тудо Таджикистан мландыште оператор-топогеозист лийын службым эрташ тÿҥалын. Тыге 19 ийым темыше рвезе Николай Валентинович Минаев илышыжым военный паша дене кылден.  Ик ият ик тылзе служитлымеке, 2022 ий декабрьыште Самара областьыш куснен, радиотелефонистын сомылжым шукташ тÿҥалын. 2023 ий январь гыч илышыже Украин мландысе специальный военный операций дене кылдалтын. Соляркым, бензиным шупшыктышо машина-влаклан вуйын шоген, сопровождающий лийын. Кум тылзе командировкышто коштмеке, Игорь курскаж деке лишкырак лияш (Тудыжо СВО-н икымше кечыж гычак Донецк велне кредалеш), тусо посна гвардейский мотострелковый бригадыш куснен, разведбатальонын отделений командирже лийын. Тидын нерген пеш ойлаш ок йӧрате гынат, Николайлан Украин мландыште сарын шучкылыкшым ятыр ужаш логалын. 

Ик заданийым шуктымо годым тудо нелын сусырген. «Кандаш постым терген лекташ кÿлын: взводын командирже сусырген. Тунам тиде пашам мыланем ÿшаненыт. Ик йолташ дене шым постым сайын эртымеке, вуй ÿмбалнына беспилотник-влак чоҥештылаш тÿҥальыч. 

А мландыште укронацист-влак «Лепесток» мина-влакым кышкеныт. Ик секундышто мый нимом умылен шым шукто, помыжалтме гай лийым, кынел шогальым, икмыняр ошкылым ыштышым да уэш шуҥгалтым. 

Мый миным тошкалынам улмаш… Беспилотник-влак изиш шыпланымеке, йолташем мыйым чашкер коклаш шÿдырен наҥгайыш, вара носилка дене - шымше постыш. Тушто ветеринар икымше полышым пуыш - йӧсӧ гынат, чытыман. Дрон-влак чоҥештылыныт, сандене эр йÿдым ик йолташ мотоцикл дене лишыл оласе больницыш наҥгайыш. Корнышто шуко гана чарнаш пернен. Вич километр кодмеке, ваштарешна толшо машина, полыш кÿлмым ужын, мыйым больницыш намиен кодыш. Врач каласыш: «Тыланет Юмо полшен, шанчаш пырче семын шаланен кертат ыле…» Сарыште икте-весылан полшымаш да иза-шольо семын илымаш салтакын кумылжым мыняр-гынат нӧлтат, айдемын илышыжым саклен кодаш полшат. Неле жапыште полшымыштлан йолташем-влаклан пеш кугу тау», - мутшым кошартыш Николай Минаев.

Варажым тудым оласе больница гыч Белгородыш, тушеч поезд дене Н.Н. Бурденко лÿмеш Москвасе госпитальыш наҥгаеныт. Пурла йолжылан кок гана операцийым ыштеныт. Вич тылзе госпитальыште да санаторийыште эмлалтмек, кызыт протезым шындаш черетым вуча. 

Младший сержант Николай Минаевым «За боевые заслуги», «За отвагу» медаль-влак дене суапландареныт. Боевой заданийым шуктымаште чолгалыкым, лÿддымылыкым, патырлыкым ончыктымыжлан 2024 ий 20 декабрьыште РФ оборона министрын полышкалышыже А.В. Фомин тудым Мужество орден дене палемден.

Николайын ончыкылан планже кугу: пачерым налын, йоллан протезым шынден, военный сомыл дене кылдалтше пашам муын, кертме семын эллан пайдам кондаш шона. А эше Таня пелашыж дене (Тудо Самара ола гыч улеш.) икшывым вучат. «Кызытсе саманыште Россий салтак могай лийшаш?» манын йодмемлан Николай Минаев тыгерак вашештыш: «Лÿддымӧ, чолга, неле гыч лекташ йӧным муын моштышо, йӧсым чытыше, кӧргӧ вий-куатан, йолташым пагалыше, но эн тÿҥжӧ - Шочмо Элнам йӧратышаш».