Ачамландым аралат

Ӱмырышт мучко колхозышто пашам ыштыше тыглай еҥ-влакын эргышт Семён СУЛТАНОВ илышыжын кужу ужашыже суртшо, ача-аваже, родо-шочшыжо деч тораште эрта манын шоналтенат огыл докан. Семён Тимирьянович военныйын профессийжым ойырен налын - Вольский военный училищым тунем пытарен. 

Училищым тунем лекмеке, самырык лейтенантым вигак Кокла Азийысе погранокругыш Тахта-Базар погранотрядыш вещевой службын вуйлатышыжлан колтеныт. Вара Таджикистанысе Моско погранотрядыш кусареныт. Тушто 1983 гыч 1987 ий марте служитлен. Тунам Афганистаныште сар каен. Семён Тимирьяновичлан Афганистаныш сар паша дене шуко гана мияш логалын. Вара тудым Байкал воктеке кусареныт. Кызыт отставкысе подполковник Семён Султанов Москваште ила. Тудын Сергей эргыжат ачаж семынак военныйын профессийжым ойырен налын. Сергей Семёнович прапорщик улеш, Абхазийыште служитла. 

* * *

Военныйын профессийже - лӱддымӧ, виян, ушан еҥ-влакын профессийышт. 

Игорь КУГУБАЕВАТ шочмо элым аралаш шкенжым йоча жап гычак ямдылаш тӱҥалын: спорт дене кылым кучен, сайын тунемын, ече дене спорт мастерыш кандидат улеш. Спорт дене талын заниматлымылан кӧра тунемаш пурашыжат куштылго лийын. Училищыште норматив-влакым сдаватлымаште эн сай-влак коклаште лийын да тудым вигак десант ротыш колтеныт. 

2007 ийыште Ӱлыл Качмаш кыдалаш школым тунем лекмеке, Тюменьысе военный инженерно-командный училищыш тунемаш пурен да тудым 2012 ийыште тунем лектын. Распределений почеш Псков олашке логалын, 76-шо гвардейский десантно-штурмовой дивизийыште служитла. Званийже дене майор улеш. Ешан, Алиса ватыж дене кок икшывым куштат. Кызыт специальный военный операцийыште участвоватла. 

* * *

Максим Александрович КУГУБАЕВ - Игорьын тукым шольыжо. Тудо 2002 ий 8 июльышто Кӧкыш ялыште шочын. Тыштак тӱҥалтыш школым тунем пытарен, вара Ӱлыл Качмаш кыдалаш школышто 6-шо класс марте тунемын, шымше классыште Нефтекамск оласе 11-ше школыш куснен, кадет классыште тунемын. Ече дене таҥасыме шотышто спорт мастерыш кандидат улеш, Нефтекамск олан сборный командыштыже лийын. 

Школым тунем лекмыж деч вара оласе национальный гвардий войскан Пермьысе военный институтыш тунемаш пурен. Распределений почеш Ростов областьыш логалын. Лейтенант, тудат специальный военный операцийыште улеш. 

* * *

Икымше чечен сар мийыме пагыт мемнан деч утыр торла да торла. Чаманен каласыман, пытартыш жапыште историйнан тиде лаштыкшым пешыжак шарнаш огыт тырше. А вет тиде сар да 1994 ий 31 декабрьыште Грозный олам штурмоватлыме деч поснат илышнам чоҥен кертына ыле. 

Ик классыште пырля тунемме рвезе-влакланат - Павел Сайнашевич Тосаевлан, Александр Григорьевич Мачинаевлан да Руслан Борисович Петровлан - тиде сарыште кредалаш логале. Армийыш кумытынат 1994 ийыште кайышт. 

* * *

Специальный военный операцийыш кайыше ялысе рвезе-влак  гыч кокытшо геройла колен, шочмо ялысе шӱгарлаште курымаш омо дене малат. 

Мый чыладамат Шочмо Элым аралыше-влакын кечышт дене алал кумылын саламлем, пиалан да улан, тыныс илышым тыланем.