Ача-влакым наградитленыт

Тиде мероприятий «Ачамландым аралыше-влак» кугыжаныш фондын филиалыштыже эртен. Пӧръеҥ-влаклан медальым филиал вуйлатыше Гульнур Кульсарина да Башкортостан Республикысе тӱҥ федеральный инспектор Алексей Касьянов кучыктеныт.

«Отец защитника Отечества» медаль дене элнам аралыше патыр эрге-влакым куштышо, мер пашам шуктышо, СВО-н ветеранже ден участникше-влаклан да нунын ешыштлан полшен шогышо, кушкын толшо тукымлан примерым ончыктышо ача-влакым палемдат.

Тыгай медаль дене Шаран районышто илыше А.А. Саитовымат суапландареныт. Аркадий Асылгареевич - У Тумбагуш ялын старостаже, ял поселенийыште мер пашаланат, СВО-ш колташ гуманитарный полышым погаш полшашат, художественный самодеятельностьыште участвоватлашат жапым муэш, РФ-н почетный доноржо улеш, калыкнан йӱлаже-влакым пагала да нуным шуктен ила.

Аркадий Асылгареевичым ты награда дене шокшын саламлена да эргыжын мӧҥгӧ сеҥымаш дене таза-эсен пӧртыл толмыжым вучена.