Салтак-влаклан черетан полыш

Моло калык дене пырля меат салтак-влаклан кертмына семын полшен шогена. Акпарс, Биктыш, Мешер, Усола, Уял, Чикей, Шалтык яллаште да Шаран селаште илыше-влак шке кумылын оксам, арверым погат, сарзыеҥ-влакын йодмыштымат шотыш налыт. Волонтёр-шамыч окопышто кучылтмо сортам ыштеныт, шокшо вургемым налыныт, маскировко сетьым пидыныт, эмшудо чайым, госпитальлан тӱрлӧ эмым да моло кӱлешым ямдыленыт. Индивидуальный предприниматель Н.М. Давлетован коллективше шуко чак-чакым кӱэштын.

Тиде гана гуманитарный полышым Ачамландым аралыше-влакын кечышт вашеш погышна. Школышто тунемше йоча-влак пайрем открыткым ямдылышт, кажне посылкыш саламлымашым да серышым пыштышна. Ме салтак-шамычлан ончыкыжат полшаш тӱҥалына. Чылаштын сеҥымаш дене таза-эсен пӧртыл толмыштым вучена!

Кушто неле, кушто мемнан полышна кӱлеш, тушто полшыде кодаш правана уке. Калыкат специальный военный операцийыште улшо-влаклан ала-кӧн шӱдымыж почеш огыл, шке кумылын полшен шога. Волонтёр, гуманитарный полышым погышо, арверым чаманыде кондышо-влаклан уло чон дене тауштем.