Суапле сомылым шуктеныт

Чумыргышо окса дене носким, кужу жап аралалтше кочкыш-йӱышым - «сгущенка» шӧрым, кофем, икмыняр банке тушенкым, шокшо носким пидаш шӱртым да молым - налыныт. Налме шӱртылан ялысе ӱдырамаш-влак салтак-влаклан шокшо носким пидаш кумылаҥыныт (Палемдыде ок лий, Калмаш ял библиотека пелен «Кудесница» усталык ушем пашам ышта. Тушко кидпашам йӧратыше ӱдырамаш-влак чумыргат.). Клубышто пӧлем йӱштылан кӧра тушто ачалыме пашам тӱҥалмеке, адакшым тӱшка сомыл тӱвыргынрак ворана манын, библиотека пашаеҥ Д.П. Головко ӱдырамаш-влакым шке суртешыже чумырен. Тыге шокшо носким пидме сомылым нуно, ожнысо семын погынен, пырля шуктеныт. Тудо кечынак салтак-влаклан полшымо нерген мутланаш специальный военный операций гыч отпускыш толшо землякыштым, тыгак Калтаса сельский поселенийым вуйлатыше Д.Е. Вахитовым ӱжыныт. СВО-ш колташ налме сатум, пидме носким, тыгак йоча-влакын салтак-влаклан возымо кумылаҥдыше серышыштым райрӱдысӧ гуманитарный полышым погымо штабыш намиен коденыт. 

* 

Тылеч посна шукерте огыл Калмаш клубышто СВО гыч отпускыш толшо «Рыбак» позывной дене палыме салтак дене вашлиймашым эртареныт. Ялче-влак салтак-влаклан полшымо йодышым тарватеныт, таза-эсен пӧртылаш тыланеныт. «Тыгай вашлиймаш-влак пеш кӱлешан улыт, нуно герой-влак воктеннак илыме нерген ушештарат», - каласыш библиотека пашаеҥ Д.П. Головко. 

Кызыт калмаш-влак СВО-со салтак-влаклан окопышто кучылташ сортам ышташ ямдылалтыт. Тидлан кӱлешан материалым поген, налын ситареныт - пырля погынен, пашалан рӱж пижшаш веле кодын.