Маядыкыште салтак-влаклан лашкам ыштат

Нунылан мемнан ялысе калыкат кертмыж семын полшен шога. Иктышт кочкыш-йӱышым, эм ден медикаментым, арверым кондат, весышт оксам пуат. 

Маядык ялысе Ӱдырамаш ушемын еҥже да клуб пашаеҥ-влак сулен налме канышыште улшо вате-влак дене пырля лашкам пӱчкеден ямдылышт (снимкыште). Нуно тиде сомылыш эн поро кумылыштым пыштеныт, «Мӧҥгысӧ лашка дене ямдылыме шӱр сарзе-влаклан вийым пуа» маныт. Тыгак йӧратен ямдылыме лашка салтакна-влаклан кредалме корныштышт шке тамжым веле огыл, эше кӧргӧ вий-куатым ешара. Элым аралыше-влакым шочмо мландыште уло чон дене вучена.