Шочмо элым аралышын идалыкше лӱмеш

Школ директор Г.Ф. Габдрахманова, мероприятийым почшыжла, погынышо-влакым шокшын саламлыш да йоча-влакым изинек патриотизм шӱлышеш воспитатлаш кӱлмым палемдыш. Тыгай шонымаш умбакыже чыла ойлышын выступленийыштыжат йоҥгалте, манаш лиеш.

Акпарс сельский поселенийын вуйлыкшо Р.Г. Ягудин лӱддымӧ, патыр салтак-влакым ончен куштышо ача-ава-влаклан таум ойлыш да специальный военный операций кайыме верлаш колташ гуманитарный полышым чолган погышо волонтер-влак дене палдарыш. 

«Тений, тӱрлӧ фронтлаште кредалше да тылыште тыршыше-влакын подвигыштым шарныме идалыкыште, мемнан районыштат патриотический акций, боевой действийын ветеранже-влак дене вашлиймаш, патырлык урок, экскурсий, выставке, спорт таҥасымаш да ятыр моло мероприятий лийыт. Акпарс сельский поселений гыч СВО-што эн шуко еҥ служитла. Тиде идалыкымат те эн ончыч почыда. Тыршымыланда тау!» - каласыш Шаран район администраций вуйлыкын икымше алмаштышыже Филюс Хакимгареев. «Ачамландым аралыше-влак» кугыжаныш фондын районысо филиалжын социальный координаторжо Гульнара Кариева ветеран-шамычлан полшаш, историй шарнымашым арален кодаш да спецоперацийыште сеҥымашым лишемдаш тӱшка вий дене ушнаш кӱлмым ушештарыш. Тыгай амал дене пайдаланен, районысо Ветеран-влакын ушемыштым вуйлатыше Минлифагил Саитов передовойышто улшо землякна-влаклан полшен шогышо, гуманитарный грузым погышо да тудым СВО ден фронт воктенысе верлашке наҥгаен кодышо-влаклан таум ойлыш. «Акпарс школышто ӱдыр-рвезе-влакым Шочмо элым йӧраташ да аралаш туныктен куштат. Тиде кундем гыч специальный военный операцийыште улшо пӧръеҥат шуко: южышт мобилизацийыш логалыныт, южышт шке кумылын каеныт. Чаманен каласыман, сӧй пасуэш вуйым пыштыше-влакат улыт. Нунын лӱмеш ӱмаште школышто Геройын партшым почыныт. Акпарс школышто СВО-н участникше-влак дене вашлийын мутланыме, сӧй пасуэш вуйым пыштыше военнослужащий-влакым шарныме, гуманитарный грузым чумырен колтымо шотышто кугу паша шукталтеш», - палемдыш шке выступленийыштыже образований район пӧлкан методкабинетшым вуйлатыше Ильвера Газизова.

Шочмо элым аралышын идалыкшым почмашке школын выпускникше, Петр Великий лӱмеш РВСН (Стратегический назначениян ракетный войска-влак) военный академийын Серпуховысо филиалыштыже 2-шо курсышто тунемше Кирилл Курмакаев толын ыле. Кирилл погынышо-влакым саламлыш да чыла погынышо калыклан тазалыкым, тыныс илышым тыланыш. Школын вес выпускникше, Вадим Атнагузин, кызыт СВО-што элым арала. Йолжо сусыргымо деч вара госпитальыште эмлалтынат, отпусклан мӧҥгыжӧ пӧртылын. Тунемме школышкыжо ӱжмылан пешат йывыртен, туныктышо-влаклан кугу таум каласыш.

Н.М. Давлетова ача-ава-влаклан тамле кӧстенечым шалатыш.

Акпарс школын тунемшыже-влак погынышо калыклан чонеш логалше, патриотизм шӱлышан почеламут-влакым, сылне номер-влакым ямдыленыт. Тиде пайрем тӱҥалтыш гыч мучаш марте патриотизм шӱлыш дене шыҥдаралтын да чыла еҥым Шочмо элым аралыше-влакын подвигышт дене кугешнаш, нуным пагалаш да шарнаш кумылаҥден.