Суапле пашаш рӱж ушнат

Тушто школ ден ял калык тидын шотышто чыла пашам пырля ворандара. 

Ялче-влак тӱрлӧ сомылым шуктат: блиндажыште кучылташ сортам ямдылат (кызытеш СВО-ш 208 калай банке сортам колтеныт), лашкам ыштат, шокшо носким, маскировко сетьым, паракорд шнур гыч кидеш пижыктыме браслетым пидыт. Чыла кӱлешан арверым, оксам поген, шкеак наледат. Суапле сомылым шукташ йоча-влакат полышкалат. Салтак-влакын кумылыштым нӧлталаш манын, нуно эше посылкылаш поро тыланымашым возымо серыш-влакым пыштен колтеныт. Чарлак-влак тыгак Дӧртыльӧ районысо моло ял дене пырля СВО-ш колташ кусаркален кондыштарыме мончам, тыгак УАЗ, «Ока» да «Нива» машина-влакым налаш оксам погаш полшеныт. «Икте-весе дене кылым ялысе чат гоч кучена. «Салтак-влаклан лашка», «Блиндаж сорта» да моло акцийым эртарыме нерген ондак чатыш возем, да ялысе калык каласыме жаплан школыш погына. Ончыч шагалрак миеныт гын, кызыт акций еда еҥ ешаралтеш», - ойла ялысе чолга мер пашаеҥ, Чарлак школын туныктышыжо Т.Г. Аптулаева.