+14 °С
Дождь
Айдеме пашаж дене мотор
22 Июня , 11:35
Ялнан шочшыжо - адакат икымше
19 июньышто «Роснефть» компаний пашаеҥже-влак коклаште мастарлык конкурсым эртарен. Тудын Уфа оласе филиалыштыже спецтехникым кондыштарыше водитель-влак усталыкыштым ончыктеныт.
Юрий Янгличев конкурс годым. Еш архив гыч налме фото.
«ЧОЛМАН» ГАЗЕТЫМ МАX-ЫШТЕ ЛУДЫНА!
Эн мастар, полмезе, келге шинчымашан пашаеҥ-влак коклаште сеҥымаш тошкалтыште икымше верым тиде ганат Ю.А. Янгличев айлен. «Конкурсыш Башкортостанысе тӱрлӧ НГДУ гыч ятыр водитель толын ыле. Теорий да практический ужашым иктешлен, жюри мылам «Роснефтьын» Сургут олаште эртаралтшаш иктешлыше конкурсышкыжо каяш правам пуэн», - каласыш Юрий Алексеевич.
Тудын водительский удостоверенийыштыже чыла категорият уло. Тиде техника деке моткоч шӱман улмыжым ончыкта. Могай гына техникым ужеш, руль ончыко шинчын да капотым нӧлтал ончаш тырша. А шкенжын машинажлан пелашыж дене мутланыме семынак порын, йӧратен пелешта.
Юрий Янгличев Красный Октябрь ялеш шочын-кушкын, туштак тунемын. Ончыкылык пелашыжымат тиде ялыштак муын, ешыште кок ӱдырым куштат. Нуно Дӧртыльӧ олаште илат. Юрий Алексеевич цементировочный агрегатыште пашам ышта. Шочмо ялыштым йӧратен, авашт-ачашт деке ужаш, полшаш эре толын коштыт. Ме, землякше-влак, Юрам саламлена да ончыкыжымат у сеҥымашым тыланена!
