«Пашаштем тӱҥжӧ - еҥ-влаклан полшаш», - ойла полицийын майоржо Валерий Минликаев

«ЧОЛМАН» ГАЗЕТЫМ МАX-ЫШТЕ ЛУДЫНА!

- Валерий Геннадьевич, сеҥымаш тошкалтыште тыгай кӱкшытыш шумаш шагал огыл вий-куатым, ӱнарым, мастарлыкым, шинчымашым йодеш. Конкурсышто могай заданий-влакым шукташ логалын? 

- Да, конкурслан кок тылзе наре тыршенак ямдылалтынам. «Физическая подготовка», «огневая подготовка», «правовая подготовка», «тактическая медицина» дисциплинылаште тӱрлӧ практический заданийым шукташ логале. Тиде кум километр кужытыш куржмаш, подтягиваний, пистолет дене лӱйкалымаш, тудым жаплан рончен погымаш, самбо кредалмашын приемжо-влакым ушештарымаш. Теорий ужашыште компьютер ончылно участковыйын службыжо дене кылдалтше тест шотан йодыш-влаклан вашештышна.   

- Участковый семын районышто могай ялсоветлан вуйын шогеда? 

- Калтаса села ден Тӧлдӧ сельсоветыш (Тӧлдӧ, Тогыний, Васильевка, У-Ял, Тошто ден У Оръямучаш, Кырпы ялла) пурышо сельский поселений-влаклан мутым кучем. Тушто калык дене тӱрлӧ шӧрынан сомылым шуктем - тиде правонарушений да преступлений шотышто профилактика паша, еҥ-влак дене «прием граждан» форматан вашлиймашым эртарымаш, иктаж экшык лийме нерген увертарыме почеш вызовыш кайымаш да молат. Тыгак чӱчкыдын шолыштмашым шымлаш, йомшо вольыкым, кайыквусыштым муаш полшаш ӱжыктат. Пашамым мый йӧратем. Мылам еҥ-влаклан полшаш келша. Нунын илышыштышт, сурт-озанлыкыштышт чыла сай гын, мыланнат сай, чонланат ласка.  

- Правоохранительный орган системыште тыршыме паша стажда мыняр ийыш погынен?  

- Кок ий армийысе службым (Пограничный войскан теҥыз частьыштыже водолазлан служитленам.) шотыш налаш гын, полицийыште ыштыме жапем 20 утла ийыш чумырга. 

- Шочмо-кушмо верда, кушто тунеммыда нергенат палаш оҥай…

- Мый Калтаса районысо ямле Торасола ялеш шочын-кушкынам. Икымше-индешымше классым, Краснохолмский селаш илаш куснымеке, 1-ше школышто тунемынам, но кеҥеж канышлан садак шочмо ялыш толынам. Школ деч вара Агидель оласе 146-шо профессиональный лицейыште тунемынам. Варарак, паша деч кӱрылтде, Уфасе юридический институтышто «Правоохранительная деятельность» специальность дене шинчымашым налынам. 

- Ешда денат палдареда?

- Столина Леонидовна пелашем туныктышо улеш, Калтаса селасе 1-ше школышто пашам ышта. Ешыште кок эргым куштена: Елисей ден Виталий эргым-влак 6-ше да 9-ше классыш вонченыт, спортлан шӱман улыт - йоча да самырык-влаклан спортшколышто полиатлон дене заниматлат.  

- Шкенданат хобби але йӧратыме сомылда уло очыни?  

- Ончыч волейбол дене модам ыле, кызыт ӱстел теннислан кумылаҥынам. Эше пӱртӱсыштӧ, яндар южышто колым кучаш йӧратем. 

- Валерий Геннадьевич, мутланымашлан тау. Куштылго огыл пашадам ончыкыжат сайын шукташ, тазалыкым, еш пиалым тыланена. Сентябрьыште Алтай крайын Барнаул олаштыже эртышаш «Профессийыште эн сай» конкурсын иктешлыше йыжыҥыштыжат Приволжский федеральный округын лӱмжым кӱшнӧ кучеда манын ӱшанена.