«Чолман» газет дене кылдалтше корныжо

- Внештатный корреспондент сомылым шукташ тендам мо таратен?

- 1991 ий 24 апрель гыч «Чолман» газетын савыкталташ тÿҥалмыже - марий калыклан кугу куан. Тудым шарымаште мыланемат 15 ий утла корреспондент семын пашам шукташ логалын. Туныктымо да директор пашам шуктымем возгалаш нимыняр мешаен огыл, спортсмен семын, кокымшо шÿлышем почылтмыла чучын, вийым пуэн. Статья савыкталтмеке, эше ончыкыжат возаш кумыл почылтын, чон сай деч сай материалым муаш йодын. Тунам интернет йӧным кучылтмо нерген шоналташат лийын огыл. Кычалынам, коштынам, йодыштынам, возенам. Архив материал-влаклан эҥертенам.  Газетыште тыршыме жапем поро шарнымашым коден, шинчымашем шуаренам, шуко оҥай еҥ нерген пален налынам, икманаш, вес орбитыште пӧрдмемла чучын. Газет ий гыч ийыш вияҥын, кушкын, тÿрлӧ кундемлаште илыше, лудаш да возаш йӧратыше-влакым иктыш ушен. Тудо жапласе газетын тиражшым ончалаш гын, 5300 утла экземплярыш шуын, Мишкан районышто гына 1000 утла еш газетым куанен лудын. Республикынан тÿрлӧ районлаштыже илыше марий-влак нерген шукырак пален налаш кугу йӧн лийын. Теве ынде 35 ият шуын, «Чолман» газет шке пашажым кызытат ий гыч ийыш умбакыже шуя да арняш ик гана лудшо-влак деке миен шуашак тырша.

- Возымо статьяда-влак гыч могай шарнымаш ушешда келге кышам коден?

-  Эртыше жапым шарналташ гын, икымше статьям возымем пеш сайын шарнем. Тудо Отечественный сарын икымше степенян орден дене палемдыме, Ленинград ола верч кучедалше сарын ветеранже Иван Ишпахтин нерген лийын. Жап эртымеке,1983 ийыште, Ленинград олаш да тусо кундемлаш 27 тунемше, эргыж ден уныкаже, нунын коклаште мыят группын руководительже семын лийынам, миен ужын толынна. И.И. Ишпахтинын кредалме корнылажым, Синявино посёлкым, кушто тудо нелын сусырген, шке шинчана дене ужынна. Да чыла тидым статьяштем почын пуаш тыршенам. Мишкан районын икымше вуйлатышыже Пётр Иванович Вавилов (Монарн) гыч тӱҥалын моло землякна - шкенан гына огыл, йот эллаштат илыше, ойыртемалтше марий ученый, военный, музыкант-влак нерген возымем келге кышам коден. Нине статья-влакым кызытат еш архивыштем аралем. Эше тыгай шарнымаш вуйыштем кодын: возен ямдылыме материалым да фотом шуко гана Бирск але Уфа олала гыч Нефтекамскыш кайыше рейсовый автобусын шофёржылан пуэн колтем ыле. Пеш кугу таум тунамсе Мишкан район администраций вуйлатыше-влаклан каласынем. А.А. Аптулманов, В.П. Бикмурзин, В.М. Андреев газет дене кылдалтше пашам эре поддержатлен шогеныт, редакцийыш коштын савырнаш машина денат шуко гана полшеныт. Редакцийыште тыршыше пашаеҥ, собкор, газетым лудын шогышо-влак - пашам чылан келшен да каҥашен шуктеныт. Кызытат газетлан подписке дене кылдалтше мероприятийлаште лияш тыршем. 

- Газетын лÿмгечыже вашеш тыланымашда могай лиеш?

-  Марий газетнан ÿмыржӧ кужу лийже. Газетым лудаш да подпискым ышташ кумылан еҥ-влак ешаралтышт. Статистика почеш, кок арнялан тÿнямбалне ик йылме йомын толеш гынат, марий йылмына ынже пыте, ынже йом. Илыш ончыко кайыме семын интернет, телефон да моло информационный средства кугу верым налын шогат гынат, марий еҥ марий газетым лудын, уш-акылым пойдарышаш, йылмым вияҥдышаш. Марий яллаште, марий школлаште марий газетлан кугу верым ойырыман. Тунам калыкнат, йылмынат, газетнат шуко-шуко ий илаш тÿҥалыт.