«Чолманлан» - 35 ий. Газетын поро йолташыже

«Шым ий ончыч ялысе почтышто Подписке кече эртыш. Тушко газетын тÿҥ редакторжо И.И. Губаев толын ыле. Мый газетлан возалтым да призым модын нальым. Пӧлеклан салат ате-влакым кучыктышт. Тылеч вара газет дене кылем эше чотрак вияҥе», - шарналта Татьяна Шайбаковна. 

Шке калыкшым пагалыше, марий шӱлышан ÿдырамаш ялыште эртарыме тÿрлӧ мероприятийлаш чолган ушна. Шорыкйолым, Ӱярням, Телым ужатымашым, Илалше-влакын кечыштым, Йоча-влакым аралыме кечым эртарымаш Тӧргымдÿрыштӧ поро йÿлаш савырнен. Пошкудо-влак дене чумырген, идалыклан икмыняр гана субботникымат эртарен колтат. Тӧргым вÿд воктене верланыше стадионым арун кучаш тыршат. «Чыла тиде пашам кÿштымӧ почеш огыл, чон йодмо почеш шуктена. Калыкнан пайремже-влак аралалт кодышт, йÿлаже калык коклаште шарлыже манын шонена. Самырык-влак, мемнам ончен, шочмо кундемым йӧраташ, тудын ончыкылыкшо верч тыршаш кумылаҥышт манме шонымаш дене илена», - каласкала газетын поро йолташыже.

Икмыняр ий ончыч, ял калык дене погынен, Кидпаша касым эртареныт. Тидын нерген Татьяна Шайбаковна икымше гана шке шонымашыжым газетыш возен колтен. Увержым савыктымылан пеш йывыртен. Тиддеч вара моло сомыл-влак нергенат возаш кумылжо почылтын. А газетын 30 ияш лÿмгечыжлан такмак-влакым келыштарен да сцене гыч йоҥгалтарен, пайремын унаже лийын.

Татьяна Ирбулатова мураш-кушташат, кидпашаланат мастар. Моторын тÿрлымӧ да ургымо тувыржо ден ончылсакышыжым ончен куанет. Лум гыч, пакча емыж гыч йомак кугыжанышым чоҥен да сӧрастарен кертеш, фантазийже пешат кугу. Шуко пашаж дене «Чолман» газетат палдарен.

«Кидпашалан мый изинек тунемынам. Ешыштына куд йоча, ачай-авай да кувавай лийынна. Авам-ачам колхоз пашаш коштыныт, садлан авам кастене але йÿдым гына кидпашам ыштен кертын. Машина дене ургаш шичмыж годым мый эре ыштыш-кучышыжым эскеренам. Вашке гыч шкежат пижгомым ургышым. А школышто труд урокышто блузкым, юбкым, брюкым, рукавицым ургенна. Мый авам деч у материалым йодын омыл, тоштым, чияш йӧрдымым ронченам. Ургаш тунеммемым ужын, авам у куэмымат пуаш тÿҥале. Школ деч вара ик жап ургымым чарненам ыле. Марлан лекмеке, ончыч авамлан тувырым тÿрлен ургышым да шочмо кечыжлан пӧлеклышым. 90-ше ийлаште, талон жапыште, вургем налаш йӧсыраклан кӧра шокшо вургемымат ургаш тунемым. Икшывем-влаклан, палымем-влаклан ятыр курткым ургенам. Тыге кайыш мыйын кидпаша усталыкем», - шарналта тÿрлӧ пашалан мастар ÿдырамаш.

Икманаш, марий шÿлышан да койышан, мастар кидан, калыкнан йÿлажым пагалыше, шочмо йылмынам йӧратыше ÿдырамаш марий газет денат кылым кучаш жапым муэш да тудын поро йолташыже улеш.

«Чолман» газетлан тыланымашда могай лиеш?» манын йодмемлан тыгай вашмутым кольым: «Марий газетнан ÿмыржӧ кужу лийже. Калыкнам ончыкыжат иктыш чумырен, ушен шогыжо. Газетыште марий йÿлам, марий тÿвыранам вияҥден шогымо нерген, патыр калыкнан илышыж нерген ончыкыжат возен шогыман. Ава шӧр дене толшо шочмо йылмым мондыман огыл. Тидлан школыштат, суртыштат коча-кова, ава-ача, туныктышо-влак эре кумылаҥден да туныктен шогышаш улыт. Газет пашаеҥ-влак шкешт таза, перашт пÿсӧ лийже. Тыршен шуктымо пашаштлан кугу таум ойлем!»