«Илышыште мо ышталтеш - чылажат сайлан»

Тудын ача-аваже, Алексей ден Марина, куд икшывылан илышым пӧлекленыт, ешыште кум эрге да кум ÿдыр кушкыныт, Галя нылымше улеш. 

Келшен илыше ешыште пашам йӧратымаш озаланен. Ача-ава ялысе фермыште тыршеныт, икшывыштлан пример лийыныт. Районысо соцтаҥасымашлаште ик гана веле огыл «Эн сай вольык ончышо» лÿмым суленыт. Аваже паша ветеран улеш, медаль денат палемдалтын. Ачажын ÿмыржӧ кÿчыкрак лийын, Галян Благовещенск педучилищыште кокымшо курсышто тунеммыж годым ош тÿня гыч каен. Тиде ойгым чытен лекташ аваже, туныктышо-влак Н.И. Бушкова да класс вуйлатыше О.И. Токтаев ой-каҥаш дене кугун полшеныт. Галина Аплатонова изинек туныктышо лияш шонымыжым шуктен кертын, 1983-шо ийыште дипломан специалист Мишкан районысо Озерка шагал комплектан школышто пашам ышташ тÿҥалын. 

«Вигак кум класс дене пашам ышташ да школ илышлан вуйын шогаш кÿлын. Самырык лийынам, но лÿдын омыл, пашалан кыртмен пижынам. Тудо ийын шыже пеш йÿран ыле, школ леведыш гыч классыш вÿд йоген. Ачалыме пашам шукташ ача-ава-влак дене пырля самырык-влакат полшеныт. Ял калык келшен илен, икоян улмыжым шуко гана ончыктен. Озерка школышто кум ий тыршен туныктымо пашам ушешем, чонешем поро шарнымашым коденыт», - мутшым шуя Г.А. Айгузина.

1986-шо ийыште Женя шольыжын армийыш кайымекше, тудо, аваж пелен лияш манын, шочмо ялысе Пÿрӧмучаш школыш куснен, кок ий тÿҥалтыш класслаште тунемше-влаклан шинчымашым пуэн. Кужу жап келшымеке, 1988-ше ийыште Шопкер ял рвезе Анатолий Сидорович Айгузин дене еш пыжашым чоҥеныт. Галина Алексеевналан паша вержымат вашталташ логалын - ик ий Шопкер пелекыдалаш школышто продлённый группын воспитательжылан ыштен. Анатолий пелашыже «Уфанефть» НГДУ-н Кушкуль селасе кокымшо нефтепромыселыштыже операторын полышкалышыжлан тыршен. Ик жап гыч ешлан ик, варарак кок пӧлеман пачерым пуэныт. Тыге Галина пелашыж дек куснен, туныктымо пашажым коден, 10 ий нефтепромыселыште диспетчерлан ыштен. Нуно татар калык коклаште иленыт, ӱдырамашым, пагален, «Галя апа» маншыжат ятыр лийын. «Карусельыште пӧрдмыла, кузе моштенна, илышнам туге намияш тыршенна, - манеш Галина Алексеевна. - Мемнан кок ÿдырна шочо. 1998-ше ийыште Павловкыш илаш куснышна, мыланна кум пӧлеман пачерым пуышт. Ик ий, пелашем дене пырля ончычсо верышкак пашаш коштым, но ӱдыр-влакым школыш колташ жап шумеке, паша гыч каяш вереште». 

Самырыкнек пашаш шуаралтше айдеме мӧҥгыштӧ шинчен ок керт - 2000-ше ий гыч Галя илышыжым Павловка селасе почта пӧлка дене кылден. Тиде пашажымат латшым ий чон йÿлен шуктен. «Илышыште чыла пашанат шке нелытше, шке кÿлешлыкше, шке акше уло, - ойла йолташем. - Газет-журналым да серышым шалатен коштмо гына шагал, кажне еҥ дене кылым муын моштыман. Почтальонын пашаже кугу тыршымашым йодеш: подпискым эртарыман, планым темыман, пенсийым шалатыман. «Россий почтын» эртарыме конкурслаштат виемым тергенам. Сад-пакча дене кылдалтше конкурсышто 1-ше верым налынам ыле. Тÿҥ призышт - велосипед - пашаштем сай йолташ лийын, кызытат коклан шинчын кудалам. «Идалыкын почтальонжо» лÿмымат сулен налаш пиал логалын». 

Пашажым сайын шуктымылан Галина Алексеевналан ик гана веле огыл Чап грамотым да таумутан серышым кучыктеныт. Марий еш-влакым «Чолман» газетым налашат кумылаҥден моштен, тудо жапыште ныл еш газетым лудын.

Айгузинмыт тачысе кече мартеат марий газетын ÿшанле йолташыже улыт. Галина икмыняр гана селаште марий касым эртарымылан вуйын шоген. Марий вургемым чиен, ик гана веле огыл йолташыже-влак дене сценыште марла муралтеныт. Г.А. Айгузина педучилищыште налме шинчымашыже, организатор талантше илышыште эре кÿлешан улмым шижын ила. Сулен налме канышыш лекмек, Павловский судоходный шлюзышто технический пашаеҥлан ыштен. Кызытат яра ок шинче, СВО-ш колташ носким, пижым пидеш, жапше улмо годым сетьым пидаш коштеш. Толя пелашыж дене икте-весылан эҥертен да ваш полшен илат. 2005-ше ийыште шке пӧртым чоҥен илаш лектыныт, сад-пакчам кучат, емыжым шындат, чывым ашнат. Анатолий Сидоровичат ик паша верыште кумло куд ий утла тыршен, кугурак оператор лийын. Пенсийыш лекмек, школышто ороллан ышташ тӱҥалын. 

Вате-марий кок ӱдырым кугемден шогалтеныт, нунылан шинчымашым налаш полшеныт. Кызыт нуным кум эрге уныка куандара. Зина ден Эмилия ÿдырышт ешышт дене Уфаште илат. Коктынат марла сайын мутланат, изишт годым татар-влак коклаште илымылан татарлат моштат. Интернациональный ешыште икте-весым пагален да умылен илат.

«Кажне еҥын шке илышыже, шке илыш книгаже. Иктым сайын умылыман: нимогай паша дечат лÿдман огыл. Керек-могай пашамат сайын, лийже манын, эре мучаш марте шуктен ыштыман. Тидлан мыйым ача-авам да Благовещенск педучилище туныктеныт. Илышыште мо ышталтеш - чылажат сайлан. Тыгай принцип дене иленам да илем», - иктешлен каласыш Г.А. Айгузина.