Илышыжым АЭС-ым, ТЭЦ-ым, ГРЭС-ым чоҥымо паша дене кылден

Армий деч вара Агидель оласе атомный электростанцийыш пашаш пурен. Паша деч кÿрылтде, оласе учебный комбинатыште атомщиклан, технологический оборудований да тудын дене кылдалтше конструкций-влакын монтажникыштлан тунем лектын. Запорожский атомный станцийыште практикым эртен. 1990-ше ийыште Агидельыште АЭС-ым чоҥымым чарымек, командировкыш кошташ тÿҥалын. Ончыч СССР, а кызыт Россий мучко АЭС, ТЭЦ, ГРЭС-влакым чоҥымаште тырша, самырык-влакым шке шинчымашыже, опытшо дене палдара. Калининград гыч тÿҥалын, Белоруссий, Прибалтика, Украина, Грузий… да Сахалин марте. А йӱдвел могырым ончалаш гын, полярный круг деч Сибирь, Бурятий да Монголий марте шуын. Теве тыгай кундемлаште эллан, калыклан кӱлшӧ кугу пашам шукта Геннадий Акмулин. Кызыт вахте йӧн дене «Квант» компанийыште тырша, котельный установко-влакын монтажникышт улеш. Ярарак жапыште книгам лудаш, кроссвордлан вашмутым кычалаш йӧрата. Йӧн лийме годым олам ончал савырнаш але ече дене кошташат жапым муаш тырша, курык трассыштат мунчалта. 2018-ше ийыште тудым «За трудовую выслугу» медаль дене палемденыт, Пашан ветеранже улеш, Чап грамотым да окса премийым налмыжым ятыр гана трудовой книгашкат возен шындыме. Теве ынде 39 ий утла ойырен налме пашажым шукта, опытым чумырен, кугу стажан специалист лийын.

Илыш ончыко кая. Интернет кыл улмылан кӧра телефон дене мутланашат йӧн кугу. 1979-1983-шо ийлаште Благовещенск педучилищыште пырля тунемме йолташ деч йоча да тунемме жапше, еш илышыж нергенат каласкалаш йодым. «Мый 1963-шо ий ноябрьыште Благовещенск районысо Уйсо ялеш шочынам. Йоча пагытыште телым ече дене кошташ, кеҥежым куржталаш йӧратенам. Ялна курыкан верыште верланен. А курык вуйышто, писте чодыра коклаште, мÿкшотар лийын. Ачам тушто мӱкшызылан ыштен. Эше изиэм годымак тудо мыланем ечым ыштен пуэн, ныл ияш йочам курыкан чодыраш пеленже налеш ыле. Курык гыч мунчалтен волаш лÿдыкшӧ, сандене мыланем тормозым ыштен. Кужу тоям руал пуа, а мый тудо тояш шинчам. Ече вашке кая гын, темдал шинчат, кÿлеш гын, колтет да вашкерак мунчалтет. 8 класс марте ныл уштыш коклаште верланыше Ежовка пелекыдалаш школыш тунемаш коштым. Школ пӧрт пеш тошто ыле, садлан сÿмырлымыж деч ончыч тунемше-влакым клубыш кусарышт, тушто 4 классым тунемна. Ныл ий жапыште кок пачашан мотор школым чоҥен шогалтышт, 8-ше классым у школышто тунем пытарышна. Благовещенск педучилищыште тунемме жап пеш писын эртыш, поро шарнымаш-влак ушышто кызытат илат.  Паша корнемым тунемме школыштемак тÿҥальым, математика, черчений, рисований уроклам намийышым. Ойырен налме профессием дене пашам шукак ышташ ыш перне - армийыш нальыч, Литва ден Латвий границылаште служитлышым, погранвойскан старшинаже званий дене мӧҥгӧ пӧртыльым», - каласкалыш Г. Акмулин.

Геннадий ден Светлана пелашыже 35 ий ваш келшен илат, кок икшывым ончен кугемденыт. Ватыже - Дӧртыльӧ районысо Йывачъял ÿдыр. Кызыт Екатеринбургышто илат.

Калыклан тулым да шокшым пуымо дене кылдалтше пашаште тыршыше Геннадий йолташнам шуктен шогымо пашаже, ойырен налме профессийже ончыкыжат эре куандарышт. Пӧртыштӧ тул да шокшо эре кÿлешан, а нунын шуктымо пашашт тыршымашым, чытымашым да келге шинчымашым йодеш.