Чыла икшывыже икгай шерге

- Людмила Вениаминовна, изишак шкендан нерген каласкалыза, кушан шочын-кушкында?

- Мыйын ӱдыр фамилием - Зайниева,1979 ий 7 ноябрьыште Мишкан районысо У Эшым ялыште шочынам. Вич ияшем годым авам ден ачам Бирскыш илаш кусненыт. Руслан изам, мый да Лариса шӱжарем, олаште кушкынна гынат, чылан марла ойласена.

- А кушто тунемында да пашам ыштенда?

- Бирскыште школым тунем пытаренам. Индешымше класс деч вара Благовещенск педучилищыш пурышым, но тунем шым пытаре, Бирскыш пӧртыльым да ЭВМ-ын операторжылан тунем лектым. 

Ешым погымек, Людмила вич икшывылан илышым пӧлеклен. Ешышт дене 18 ий Бирск районысо Памаш ялыште иленыт. Людмила кевытчылан ыштен, йоча-влак Памаш школышто тунемыныт. Но тӱрлӧ амаллан кӧра пелашыж дене ойырлаш логалын.

2020-шо ийыште шуко икшыван авалан илыме верым налаш сертификатым пуэныт. Тыге тудо Иглино поселкышто пӧртым налын да икшыве-влак дене илаш тӱҥалын. Можо куандарыш: ешыште чылан марла мутланат. Памашыште пырля илыме йолташышт дене кылышт кӱрлын огыл. Ӱмаште Памаш ялсовет вуйлатыше Э.М. Иванова Аван кечыжлан Людмилам пайремыш ӱжын. Лӱддымӧ, патыр эрге-влакым ончен куштымыжлан таумутан серышым да пеледыш аршашым кучыктеныт.

Людмила Вениаминовна кок эргым да кум ӱдырым ончен куштен. Егорлан 26 ий, Германлан 24 ий темын. Кугу эргыже армий деч вара Уфаште полицийыш пашаш пурен, водительлан ыштен. А Герман армийыш каен да туштак контрактым подписатлен. Кодший кеҥежым Егор шольыж дек гуманитарный полышым намиен коден, а сентябрьыште шке кумылын СВО-ш каен. «Шольым да йолташем-влак тушман деч элым аралыме годым мыят тушто кӱлешан улам», - манын аважлан. Кызыт Людмила Вениаминовнан кок эргыжат СВО-што улыт, «Участник СВО» медаль дене палемдалтыныт. Наталья ӱдыржӧ Башкир кугыжаныш университетым тунем лектын, Сбербанкыште пашам ыштен, кызыт изи йочаж дене декрет отпускышто улеш. Анастасия кокымшо ий Уфасе Наука да технологий университетын Бирск филиалыштыже, физкультур отделенийыште, шинчымашым пога. Алиса ӱдыржӧ 10-шо классыште тунемеш.

Л.В. Арслановам «Материнская слава» медаль дене палемденыт. Тудлан наградым республикынан тунамсе вуйлыкшо Рустэм Хамитов кучыктен.

Изирак кап-кылан 46 ияш ӱдырамашым ончен куанет: тудо ава улмыж дене чот кугешна. Южо еҥ ик йочам шочыкта да, тетла огеш кӱл манын, тӱжем амалым муын кертеш. А весе вич але шукырак йочам ышташат огеш ӧр. Тыгай ӱдырамаш-влак утларак пиалан улыт. 

Тений Аван кечыжлан Иглин районын вуйлыкшо Гюзель Насырова СВО-што улшо салтак-влакын аваштлан «Матери участника СВО» медальым кучыктен. Нунын коклаште марий ӱдырамаш Л.В. Арслановат лийын.

- Те пиалан улыда? - йодым Людмила деч.

- Да. Мо мыланем пиал? Кунам шонымаш шукталтеш да чонлан ласкан чучеш. Мый ава улам. Мом шоненам, чыла шукталтын: кок эргым да кум ӱдырым куштенам. А ынде эн тӱҥжӧ - нуно таза, пиалан лийышт. Эргым-влак таза-эсен пӧртылышт. Илышыштышт чыла сай лийже!

Людмила Иглиноштат кевытыште пашам ышта. Яра жапыште йочаже-влак пелен лияш тырша. Шке автомашинам виктара, сандене олаш але эше иктаж-кушко миен толаш пеш йӧнан. 

Людмила Вениаминовна кажне икшывыж дене кугешна. Кугу лийыныт гынат, эре нунын нерген шона. Тудлан чыла икшывыжат икгай шерге.