Чулым, поро да самырык шӱм-чонан

Тиде ӱдырамаш 1960 ий 22 августышто Караганда областьын Сарань олаштыже шочын. Тунам ачаже тушто шахтерлан ыштен, аваже йочасадыште воспитательлан тыршен. Изиж годым ешыже Шаран район Янахмат ялыш пӧртылын, тыге йоча жапше ялыште эртен. 

«Верысе школышто кандаш классым тунем пытарымеке, куд ӱдыр Туймаза олаш яндам ыштыме заводыш кайышна. Но мылам тушто ыш келше. Дуван селаште торгово-производственный курсыш тунемаш пурышым. Ик ий гыч тудым йошкар диплом дене тунем лектым. Шараныште кондитер цехым почыч да мыйым тушто вуйлатышылан шогалтышт. 1982 ийыште Валентин Николаевлан марлан лектым. Нижневартовск олаш илаш кайышна. Туштат кондитерлан ыштышым», - шарналтен каласкала ӱдырамаш.

«Паша пукша, йӱкта, сай илаш туныкта» ой дене келшыде ок лий. Перестройка жапыште окса укелан кӧра паша вер-влакым петыраш тӱҥальыч. Тунам Лидиялан 10 ий автозаправкыштат ышташ логалын. 2002 ий гыч предприниматель семын палыме улеш. Еш бизнесышт тӱзланыме жапыште индеш вере кевытым кученыт. Чикейыште «Лидия» кевытым почаш Башкортостанын икымше президентше М.Г. Рахимов шкеак толын. Тунам Шаран районышто тиде икымше частный магазин лийын. Илыш йыжыҥан маныт, тӱрлыжат лиеш. Пелашыж дене ойырлымо деч вара 2021 ий гыч чыла паша шке ӱмбалныже. Лидия Давлетзяновна чулым, виян ӱдырамаш, ынде еш бизнесым моштен умбакыже шуя.

Ӱдырамаш пашам чыла вереат тыршен ыштен, чумыр стажше 45 ийыш погынен. Тудо пашан ветеранже улеш. Пелашыж дене кум йочам ончен кугемденыт. Инга ӱдырышт, врачлан тунем лектын, ятыр ий Шаран рӱдӧ больницыште педиатр-инфекционистлан тыршыш, кызыт ешыж дене Тамбов олаште ила, ныл икшыван ава. Лина ӱдырышт - юрист, ныл йочан ава улеш, Николай эргышт - кужу корныш коштшо водитель, пелашыж дене кок икшывым кугемдат. Нуно ешышт дене Шараныште верланеныт. Икшыве-влак чыланат илышыштышт шке корныштым муыныт, пашам ыштат. Кова лу уныкалан куанен ила.

Ийготым шотыш налде, Лидия Давлетзяновна моткоч чулым, весела, поро кумылан ӱдырамаш улеш, мер пашам йӧрата, районысо марий мер ушемын ик чолга еҥже. Ялыште старостын полышкалышыже, калык дене каҥашен пашам ыштат. Тӱрлӧ мероприятийым эртарыме годым эре спонсор семын полша, СВО-лан гуманитарный полышым колтымаштат ятыр тырша. Тӱрлӧ мероприятийыш ушна, муралташ-кушталташат кумылан. «Поро подписка» акций годым кугурак тукымлан кажне ийын «Чолман» газетлан подпискым пӧлекла.

Август мучаште «Лидия» кафеш сылне вургемым чийыше калык ятыр погынен ыле - иктыже весыж деч моторын койын. Тиде кечын Лидия Николаева тушто 65 ияш юбилейжылан пӧлеклыме пайрем касшым эртарен. Лида акайлан пеҥгыде тазалыкым, чон ласкалыкым, кужу ӱмырым, умбакыжат тыгаяк чулым, поро да самырык шӱм-чонан лияш тыланем.