Чулымлыкшо илышыштыже эре полша

Тудо 1955 ий 8 августышто Тӧргымдӱр ялеш шочын. Куд икшыван кугу ешыште кушкын. Ачаже Александр Идылбаевич Кугу Соказа ялысе школышто пашам ыштен, труд, рисований, черчений предмет-влакым туныктен. Аваже кохозышто тыршен. 

Рвезе изинек тӱрлӧ кидпашалан шӱман кушкын, ачаже воктене тыршен. Палдарыде ок лий: Александр Идылбаевич шке кундемыштыже веле огыл, моло районыштат кумдан палыме кидмастар лийын. Тудо тӱрлӧ арверым ыштен, но утларакшым - мебельым. Ачаже воктене эрге-влакат шогылтыныт.

Кудымшо классыште тунеммыж годым Владимир ачаж дечын велосипедым налын пуаш йодын. Ачаже тидлан каласен: «Шкафым ыште да ужале, вара налат...». Владимир ӧрын шоген огыл - инструмент-влакым налын да шкафым ыштен. Ужаленат кертын, тыге икымше пашажлан икымше пашадарым налын. Тылеч вара Пӱрӧ ола гыч велосипедым налын толын. Икманаш, Владимир Александрович изинек чулым лийын. Чулымлыкшо илышыштыже эре полшен шоген. Кызытат полша.

В. Иликбаев Кугу Соказа ялысе кандашияш школым 1970 ийыште пытарен, вара 4 ий техникумышто тунемын. Техникум деч вара, армийыш кайымешкыже, «Заря» совхозышто экспедиторлан ыштен. 1974 ий ноябрь гыч 1976 ий ноябрь марте армийыште служитлен. Учебкым Белоруссийыште -  Гомельск областьыште - эртен. Умбакыже Украиныште - Житомир областьыште - стратегический ракетный войскаште служитлен. 

Демобилизаций деч вара 1978 ий марте Калинин лӱмеш колхозышто (Кугу Соказа, Коклалоҥго, Тӧргымдӱр, Пӱнчер ял-влак пуреныт.) диспетчер лийын ыштен. Армий гыч шукерте огыл пӧртылшӧ чулым рвезым, конешне, виклан эсапленыт да верысе комсомол организацийын секретарьжылан шогалтеныт. 

1977 ийыште Владимир ончыкылык пелашыжым, Татьяна Ахтияровам, вашлийын. Нуно Кугу Соказа ялысе клубышто палыме лийыныт - ӱдыр Ӱкӱдӧ ял гыч сӱаныш унала толын улмаш. Самырык-влак икте-весыштлан келшеныт да мужыраҥыныт. 

1978 гыч 1980 ий марте Владимир Александрович колхозысо профсоюз  комитетын председательже лийын.

Рвезе образованийын кӱлешлыкшым сайын умылен. Сандене 1978 ийыште Башкир ял озанлык институтын экономический факультетыш заочно тунемаш пурен, «управление сельскохозяйственным производством» специальностьым налын.

1979 ийыште Владимир Александрович КПСС-ын еҥже лийын. 1980-1985 ийлаште Ленин лӱмеш колхозышто (Чорай, Пӧкленде, Октябрь, Маевка, Раевка, Константиновка ял-влак пуреныт.) партком секретарь лийын. 

Тылеч вара Владимир Александрович ешыж дене Пӱрӧ районысо Питяково ялыш илаш куснен. Ондак «Бирский» совхозышто отделений вуйлатышылан ыштен, тӱкан кугу вольыкым пукшымо шотышто комплексым чоҥымо пашам вуйлатен. Варажым чулым специалистым тиде комплексым вуйлатышылан шогалтеныт. Старший прораб да тӱҥ инженерат лийын. Чулым пашаеҥым чӱчкыдын тӱрлӧ олалашке шапаш ужашым кычалаш колтеныт. Владимир Александрович тыгай пашам эре кӱлеш семын шуктен - нигунам яра пӧртылын огыл. 

«Бирский» совхоз шаланымеке, В. Иликбаев «Уфанефть» ООО-што нефтьым лукмо шотышто операторлан ыштен. Тушто пенсийыш лекмешкыже тыршен. 

Владимир Александрович кеч-кушто пашам ыштен гынат, Татьяна пелашыже эре ӱшанле эҥертышыже лийын. Нуно  кок эргым да ик ӱдырым ончен куштеныт. Коча ден кувавам кызыт вич уныка куандара. 

Пенсийыште улеш гынат, Владимир Алекандрович яра ок шинче. Мо оҥай, тудо кызыт Питяково селаште Владимир Янсубековын мебельный цехыштыже ышта. Икманаш, изиж годым ачажлан тӱрлӧ мебельым ышташ полшен гын, кызыт чулым марий рвезылан тыгаяк пашам шукташ полша.