«Шочмо ялемым нигунам ом мондо»

А.Б. Сафаров 1959 ий 3 январьыште Шаран районысо Янахмат ялеш шочын. Ялысе школ деч вара 9-10 класслаште Акпарс школышто тунемын. Кыдалаш шинчымашым налмек, ик ий Акпарс школышто лаборантлан ыштен, 1977 ийыште Марий кугыжаныш пединститутын индустриально-педагогический факультетшын студент ешышкыже ушнен.

Институтышто ныл ий писын эртен. 1981 ийыште Абдулбай Бикбулатович «общетехнический дисциплиным туныктышо (труд туныктышо)» специальность дене дипломым налын. Самырык специалистым распределений дене Мордовийыш колтеныт. Тыге марий рвезе мӱндыр кундемыште илаш тӱҥалын, 30 ий Лямбирский районысо Аксеновский кыдалаш школышто пашам ыштен. Труд уроклаште рвезе-влакым станок дене пашам ышташ, пу гыч пӱкеным, йытырым, ӱшым да суртышто кучылтмо моло арверым ямдылаш туныктен. Пашам тыршен ыштымыжлан шуко гана Чап грамот да таумутан серыш дене палемденыт.

Самырык туныктышо туштак шке пӱрымашыжым вашлийын.1985 ийыште Гульсира лӱман татар ӱдырым марлан налын.

Тений пырля илымыштлан 40 ий лиеш.  

Абдулбай Бикбулатович сулен налме канышыште улеш гынат, яра ок шинче. Евроремонт дене заниматла: пӧртлаште да пачер кӧргыштӧ плитка-влакым опта, обойым клеитла, моло пашамат моштен шукта. Ватыже больницыште медсестралан ышта, Алина ӱдырышт фармацевт улеш.

Абдулбай, вес калык коклаште илат гынат, шке шочмо кундемжым, марий йылмым, йӱлам жаплен ила. Кажне кеҥежым шочмо ялышкыже пӧртылеш, ава-ачажын сурт-печыжым тӧрлен, пӧрт кӧргыжым порлен, чиялтен шынден. Ватыж дене коктын ик тылзе тушто илен каят. 60 ияш юбилейжымат Янахматыште родо-шочшышт дене пырля эртареныт.

Абдулбай Бикбулатович мыланем шочмо вер-шӧржӧ нерген чон почын каласкалыш, вет тыште тудлан кажне лукшо палыме, лишыл. «Янахмат ялыштем еҥ-влак икте-весе дене келшен, полшен илат, икоян, сай кумылан улыт. Калыкна уста, пашам йӧратыше. Мемнан историйна оҥай, событийлан поян, тыште марий поэт Шадт Булат шочын-кушкын. Кызыт ялыште кугу мотор школ, йочасад, клуб, ФАП, кевыт уло. Школышто 1-ше гыч 9-ше классла марте туныктат. Мый шочмо ялемым нигунам ом мондо, эре шарнен илем. Янахмат тӱзланыже, калыкше шукемже», - манеш тудо.