Жап писын эрта улмаш

Тений институтым тунем пытарымыланна 40 ий теме. Вера деке кажне кеҥежым унала пурен лектына, самырык пагытым шарналтена, илыш нерген мутланена. А илыш корно йолташнан тӱрлӧ лийын. Вера Иксанова Бирск районысо Памаш ялеш шочын-кушкын, туштак 10 классым тунем пытарен. Вара вич ий Йошкар-Олаште илен, пединститутышто шинчымашым поген.

Институт деч вара самырык туныктышо Вера Исламовна Пеньково ялысе школышто тӱҥалтыш класслам кок ий туныктен. 1986 ийыште шке ялжынак Борис Николаевлан марлан лектын. Борис пелашыже Бирск ПМК-ште водительлан ыштен. 

Самырык еш олаш илаш куснен. Тӱҥалтыш жапыште тӱшкагудышто иленыт. Поче-поче 1987 ийыште Таня, 1988 ийыште Ирина ӱдырышт шочыныт. Борислан пашаж гыч кок пӧлеман пачерым пуэныт, 1989 ийыште 8 мартлан кок икшыван еш у пачерыш илаш куснен.

1991 ий гыч Вера 9-ше номеран «Алёнушка» йочасадыш пашаш тӱҥалын, пенсийыш лекмешкыже, туштак воспитательлан тыршен. Марийже дене кок икшывым кугемденыт, тыршен пашам ыштеныт. Вара Борис чодыра озанлыкыш трактористлан куснен. Паша верже гыч тудлан пӧртым нӧлташ верым пуэныт. Шке вий дене у пӧртым нӧлтеныт, но... Илыш - тӧрсыр корно, чылажымат эртыман, куанжат, ойгыжат лиеш. 2006 ийыште аварийыште Таня ӱдырыштын ӱмыржӧ лугыч лиеш, 2010 ийыште, ӱдыржӧ верч ойгырен, Борис черланен колен. Вералан шкаланже у пӧртыш газым, вӱдым пурташ логалын. Ирина ӱдыржын ава капитал оксажым кучылтын, пӧрт кӧргыштӧ чылажымат шотыш конденыт. 

Кызыт Вера ӱдыржӧ-веҥыже да уныка-влак дене пырля Бирск олаште шке суртпече дене ила. Ынде сулен налме канышыште улеш, пакчаште тӱрлӧ емыжым, пакчасаскам кушта, крючок дене пидаш йӧрата. Телым бассейныш коштеш, кеҥежым кажне ийын Соль-Илецкыш миен толеш. Яра жапыштыже «Чолман» газетым лудаш йӧрата. Мыйым ӱдыр-веҥыж дене марла мутланымышт чотак куандарыш. 

Жап писын эрта улмаш. Ийготна дене 63 ияш улына гынат, чонна дене тугаяк чулым, самырык годсо гаяк писе улмыла чучеш. А кузе икте-весынам шокшын вашлийна, ӧндалалтна! Мемнам тыге шокшын вашлийметлан, Вера, пеш кугу тау!