Тыршымыжым теҥге денат, метр денат висаш ок лий

Валентина - чулым ӱдырамаш, уста организатор. Ял калыкым тӱрлӧ пашаш поген кертеш: я тӱзатыме сомылым, я субботникым организоватла. 2023-шо ийыште тудын ойжо дене ер воктене пушеҥге-влакым руэныт, уке гын ӱмылышт вочмылан кӧра корно эре лавыран лийын. Тылеч вара, Валян организатор моштымашыжым, чулымлыкшым ужын, ял погынымаште старосталан сайленыт.

Валентина шуко икшыван ешеш шочын-кушкын. Ынде шкежат 7 икшыван ава, 3 уныкан кова улеш. Кок ӱдыржӧ ешан улыт, а 5 эргым эше ончен куштыман. Кодшо ийын марийже ӱмыр лугыч лие, садлан шкетланже пеш куштылгак огыл. Ялыште илыше еҥын сурт вольыкшат уло: пукшаш-йӱкташ, вӱта кӧргым эрыкташ кӱлеш. Пакча пашамат ворандарыман.

Туге гынат староста пашажым ок мондо, шуктенак шога. Кодшо ийын тудын вуйлатыме почеш шӱгарлаште изирак пӧртым чоҥышт, туалетым, капкам ыштышт. Тений профнастил дене печым печышт. Шошо годсек икмыняр гана субботникыш лектыч. Ты сомылым ворандарымашке ялысе чыла калык ушнен: кӧ шке пашам ышташ коштын, кӧ окса дене полшен.

Мемнан старостана лымат ок лий: теве, «Ужар Башкирий» акцийыш ушнен, пушеҥге ден вондер-влакым шындаш тарата, теве шӱгарлам шотыш кондаш, корно воктен шӱкшакым погаш субботникым тарвата, обелиск воктен пеледышым шында.

«Мыланем староста лияш неле огыл. Мый еҥ-влакым пагалем, нунын дене мутланаш йӧратем, куштылгын тарванем. Неле годым полшенат кертам. Шочмо ял верч тыршымым пеш кӱлешанлан шотлем. Тыште эреак арулыкым кучыман манын шонем. Ял калыкат тидым сайын умыла да эреак полшен шога», - ойла Валентина Владимировна.

Валентинам шкешотан волонтер манашат лиеш: йодшо-влаклан интернет гоч коммунальный услугылан тӱла, кугу ийготан пенсионер-влаклан увертарымаш-влакым сераш полша, кӱлеш гын, Шаран гыч эмымат налын толеш, уколымат ыштен кертеш (медицина образованийже уло).

«Кушеч тыгай изирак капан каура ӱдырамашын тынар вий-куатше манын ӧрат», «Валентина староста пашажым кудалта гын, ялыште шӱкшудо поша», «Ты пашам иктат тудын семын намиен ок керт», «Тиде ӱдырамашын тыршымыжым теҥге денат, метр денат висаш ок лий. Тудо илыш примерже дене мемнан изи элнан пӱрымашыже шкенан кидыште улмым умылаш полша», - ойлат ялыште. Валялан ончыкыжат тыршен ыштыме пашажым тыгак аклен шогышт манын да куштылгылыкым, тазалыкым, пиалым тыланен кодам.