Айдемым паша чапландара

Людмила Алексеевна тунеммыж годымак чулым лийын. Тидым студент жапыште тудлан кучыктымо Чап грамот-влакат пеҥгыдемдат. Колледж деч вара 2006 ийыште Марий кугыжаныш университетын тӱвыра да сымыктыш факультетшым тунем пытарен. 

Паша корныжо Коянысе Йоча сымыктыш школышто калык инструмент пӧлкаште тӱҥалын. Маядыкыш марлан толмек, Дӧртыльӧ музыкальный школын филиалыштыже ӱдыр-рвезе-влакым баян дене шокташ туныкта, школышто технологий, музыка урок-влакым намия, «Теремок» йочасадын музыка пашаеҥже лиеш. 

Алена ден Никита икшывыштым изиш кугемдымек, кокымшо кӱшыл шинчымашым налеш да эше тӱҥалтыш класс-влакымат туныкташ тӱҥалеш. Л.А. Ишалина - кӱшыл категориян туныктышо. Чумыр педстажше - 24 ий. 

Районышто ий еда эртарыме «Весенняя капель» конкурс-влакыште мемнан школын тунемшыже-влак мурымаш-куштымашышт дене эре сеҥыше-влак радамыш логалыт. Маядык йоча-влакым моштен туныкташ гына кӱлеш - чыла кертыт. А тиде пашам Людмила Алексеевна пеш сайын ыштен мошта. Теве теният ӱдыр-влакын «Эрвий» куштышо ансамбльышт кокымшо верым налын. Тидлан кузе от йывырте?! Мыняр конкурсыш ушненыт - дипломыштат тунарак.

Л.А. Ишалина 2015 ийыште «Идалыкын туныктышыжо» район конкурсышто мастарлыкшым ончыктен да кумшо верым сеҥен налын. Йоча-влакым сайын туныктымыжлан да устан шуарымыжлан район администраций вуйлатыше Р.С. Юсупов (2019 ий), ЦРТДЮ директор В.Т. Максютов (2022 ий) Чап кагазым кучыктеныт.  

Людмила Алексеевна кок ий школ музейым вуйлата. Тунемше-влак дене Маядыкын историйжым умбакыже шымлат да погымо материалышт дене альбом-влакым сӧрастарат.

Людмила Алексеевналан пашаштыже кугу сеҥымаш-влакым тыланена. Шкежат, ешыжат таза-эсен лийышт.