Ямдым огыт кычал

Кажне еҥын шочмо кундемыштыже йӧратыме верже уло. Юрийын тыгай верже -  Мишкан покшелне верланыше парк. Изиж годым тудо аваж дене пырля тушто кошташ, лӱҥгалтыш дене лӱҥгалташ, карусельыште пӧрдаш йӧратен. Но варажым тиде парк нигӧлан кӱлдымыш савырнен.

«Ава-ачамын самырык улмышт годым тиде паркыште кас еда музыка торашке шергылтын, дискотекым, тӱрлӧ тематический кас-влакым эртареныт, чылажат пеш мотор лийын, - шарналта Юрий Алексеевич. - Кок тӱжемше ийла тӱҥалтыште тушто шӱкшудо гына кушкын. Молан чыла тидым уэш пӧртылташ огыл манын, лишыл еҥ да йолташ-влак дене каҥашен, паркым тӱзаташ тарванышна». Эн ончычак шӱкшудым соленыт, ӱстел-влакым шынденыт, корным ыштеныт, асфальтым вакшыныт. Ожнысо гаяк лӱҥгалтыш-влакым шогалтеныт, карусельым ыштеныт. Дискотекым эртараш куштымо площадкым йӧнештареныт. Илыш тушко уэш пӧртылаш тӱҥалын. Но ала-могай тӧралан тидыже келшен огыл, очыни. Парк капкаш кугу кӧгӧным сакеныт.

Мутат уке, Александровын кумылжо волен гынат, поро пашам ыштыме койышыжо йомын огыл. 

Воктенак адак вес, «Ава ден йоча» парк лийын. Тудат нигӧлан кӱлын огыл. Адакшым тиде паркше Юрий Александровын паша верже воктенак. 

Сандене тудым тӱзаташ тӱҥалын. Ты парк купан верыште, лопышто лийын. Эн ончычак тудым кошташ кӱлын. Александровмыт дренажный системым ыштеныт, брусчаткым вакшыныт. Уста предпринимательын тӱҥалмыжым верысе администраций йӧплен да пашашке ушнен. Кызыт тиде парк Мишканыште илыше-влакын эн йӧратыме верышкышт савырнен.

 Юрий Алексеевич - чолга марий, келшыше образованийым налын, амалкалче пашам тӱҥалын. Эн ончычак кызытсе жапын йодмашыжлан келшыше кочкыш сатум ужалыме кевытым чоҥаш шонен пыштен. Тыге Мишкан покшелне пеш чапле «21 век» кевыт шочын. Тушто сату эре свежа, сатучо-влак поро, ныжыл кумылан улыт. Кевытыш эре пурымет вел шуэш. Тиде кевытыште кугу супермаркетысе гай чыла тӱрлӧ сату уло.

 2004 ийыште вате-марий Ульяна ден Юрий Александровмыт киндым кӱэштме пекарньым почыныт.

- Тиде пекарньым мый Павел кочам лӱмеш почынам, - манеш Юрий Алексеевич. - Кугу Отечественный сарын пытартыш ийыштыже кочам нелын сусырген. Тудым мӧҥгӧ колтынешт улмаш, но кочам йолташыже-влак дене кодаш йодын. Тунам тудым киндым кӱэшташ колтеныт. Тиде пашаж дене тудо пеш кугешнен, вет тудын кӱэштме киндыже сеҥымашым лишемдаш полшен. Тудо сар нерген шуко каласкален. Южгунам киндым шке кӱэштын. Кызытат умшаштем кочамын кӱэштме киндын тамжым шижам, тудым уэш да уэш кочкын ончымо шуэш. Тиде амал денак кочамын рецептше почеш киндым кӱэшташ тӱҥалаш кумыл лектын.

- Мыланна йолташ-влак чот полшеныт, - мутланымашке ушна Юрийын Ульяна пелашыже. - Ме Юра дене пырля Саратовыш оборудованийлан шке мийышна. Йолташна-влак коҥгам, газ оборудованийым шындаш туныктеныт да полшеныт, документ-влакым оформитлыме паша эн кужун шуйнен. Тыштыжат йолташ-влакын полышыштлан эҥерташ логалын. Ынде чыла шеҥгелан кодын, таче бухгалтерийым мый шке намием, вет финанс университетым тунем пытаренам, 10 ий банкыште пашам ыштенам.

Юрий Алексеевич районын мер илышыштыже чолган участвоватла. Тудо Мишкан сельсовет сельский поселенийын депутатше улеш. Спорт дене пеҥгыде кылым куча. Волейбол командын капитанже, телым хоккей дене модаш йӧрата.

Александровмытын кум икшывышт уло: Анастасия, Даниил да Александр. Еш оза «Кушто ме улына, тушто илышым саемдена, ямдым да сайым кычал огына кошт» принцип дене ила да пашам ышта. Ончыкыжо икшывыже-влакат тыгай принцип денак илаш тӱҥалыт манын, пеҥгыдын ӱшана.

Ме тудлан пеҥгыде тазалыкым, пашаштыже кугу сеҥымашым, мер илышыште чолгалыкым тыланена!