+17 °С
Ясно
Айдеме пашаж дене мотор
5 Апреля 2025, 04:35
Пу арверым ыштылеш
Евгений Иликбаевым (снимкыште) ялыште гына огыл, районыштат сайын палат. Тудо пу гыч мотор деч мотор да пайдале арверым ыштылеш. Ик кечын тудын деке Ӱлыл Качмаш кыдалаш школын тунемшыже-влак унала миеныт. Тудо рвезе-шамычлан пу гыч пӱчкедыме мастер-классым ончыктен.
Евгений Иликбаев. Авторын фотожо-влак.
Евгений Илтубаевич изинек пу дене пашам ышташ тӱҥалын. Кызыт, технологий курымышто, шке талантше да опытшо дене кушкын толшо тукымымат палдара. Тунемше-влак пашажым уло кумылын шымленыт да шкештат тӱрлӧ ӱзгарым ыштен онченыт. Конешне, чылажат вигак миен ок лек, тидлан жап да опыт кӱлыт. Туге гынат, нунын йӱлышӧ шинчаштым ужын, рвезе-шамычын чыла миен лектеш манын шонымо шуэш. Тек нунат пайдале пашам шуктат да урем мучко тыглай гына перныл огыт кошт. «Еҥ-влак иктаж-мом ыштен пуаш йодыт?» манын йодмемлан Евгений Илтубаевич тыгерак вашештыш: «Пеледыш атым, пӱкеным, омсам, окнасергам ышташ йодыт, шошо вашеш шырчык омартам йодаш тӱҥалыт. Паша деч посна ом шинче. Йодшо-влак лектынак шогат».
Е. Иликбаев йоча-влакым паша опытшо дене палдара.