Военный корреспондентын тукымжо Шаран районышто вожым налын

- Полина, кузе тыгай темым ойырен налынат? 

- Чылажат ик серыш гыч тӱҥале. Кодший школыш Олина Митриевна Куксенкова деч (ӱдыр фамилийже - Ибядуллина) серыш толын. Тиде ӱдырамаш - Ирина Куксенкован аваже. Тудо Шаран районышто илыше родо-шочшыжо-влакым кычал муаш полшаш йодын. А ача-аваже Пекшаул ден Акпарс яллаште шочын-кушкыныт улмаш. Мыят Пекшаулышто илем, садлан палыме журналистын ешыж нерген уверым погаш шонымаш шочо. Материалым чумыраш ялыштына илыше Петр Михайлович Ибядуллинат полшыш.

-  Могай оҥай факт-влакым пален нальыч?

- Олина Митриевна - СССР-ын спорт мастерже, спортивный гимнастика дене сулло тренер. Тудын ачаже Митра Набиуллинович Ибядуллин Шаран район Пекшаулеш шочын-кушкын. Илыме пӧртышт ялыште кызытат уло. Аваже, Лидия Давлетовна Исламова, пошкудо Акпарс ял гыч лийын. Олина Митриевнан кочаже, Давлет Саитович Исламов, кодшо курымын 30-шо ийлаштыже школ директорлан ыштен. Куваваже, Татьяна Павловна Мещерякова, Мешер ял гыч лийын. Нуно  Школ уремысе 16-шо номеран пӧртыштӧ иленыт. Нунынат пӧртышт аралалт кодын. 

Олина Митриевна шкеже Ташкент олаште шочын-кушкын, туштак университетым тунем лектын. 1983 ийыште Юлий Михайлович Куксенковлан (спортивный гимнастика дене тренер) марлан лектын. 1984 ийыште Ирина ӱдырышт, 1989 ийыште Николай эргышт шочыныт. Николай - аваж гаяк спортын сулло мастерже, Рио-де-Жанейрошто эртыше Олимпийский модмаште ший призер лийын. 

Митра Набиуллинович, Ирина Юльевнан кочаже, Рязаньыште летный училищым тунем лектын, гражданский авиацийын пилотшо, юж суднон командирже лийын. Мыйын шонымаште, тиде ешыште чулымлык да патырлык ик тукым гыч весыш куснен толыт. 

Таклан огыл Митра Набиуллиновичын Ирина уныкаже военный корреспондент профессийым ойырен налын.

- Ирина Куксенкова - шокшо точкылаште пашам ыштыше военный корреспондент. Тудын пашаж нерген шуко материалым кычал муыч?

- Украина - Ирина Юльевнан икымше шокшо точкыжо огыл. Тудо Чечняште, Ингушетийыште, Абхазийыште, Дагестаныште, Кечывалвел Осетийыште, ДНР-ыште да ЛНР-ыште пашам ыштен. Эн шуко репортажым Донбассыште ямдылен. Тале кредалмаш кайыме верлаштат репортаж-влакым возаш лӱдын огыл. Специальный военный операций кайыме верлаште икымше кечыла гычак пашам ыштен. 2022 ий 11 апрельыште Мариупольысо промзонышто репортажым возымыж годым чот сусырген. Тудлан икмыняр неле операцийым ыштеныт. «Чылажат сеҥымаш верч» проект дене полышым погымо сомылымат Ирина Куксенкова тарватен. Тыге мемнан элысе калык ДНР-ын калык милицийжын разведывательный подразделенийжылан кум кечыште кӱлеш наре шийвундым поген шуктен. Ирина Куксенкова эше Калык фронтын «Служба сопровождения ветеранов СВО» проектшым вуйлата. «Кажне еҥ шке верыштыже эллан сеҥымашым лишемдаш полшен да пайдам конден кертеш. Мый чыладамат суапле сомылым шукташ ӱжам», - пеҥгыдын каласен военкор.

- Полина, тыгай еҥын илыш корныжым пален налмек, тыйым могай шижмаш авалтыш?

- Мый Ирина Юльевнам геройлан шотлем да тудын дене кугешнем. Телеграм-каналжыланат возалтым, публикацийже-влакым эскерем. Мыят тудлан серышым колтышым. Кочаж ден коважын шочмо-кушмо верыштым ужаш толеш гын, ала вашлийынат кертына манын шонем.

- Тау, Полина. Тыят тиде тале ӱдырамаш гаяк чулым, эре уым кычалше лий!