Туныктышо шкежат эре тунемеш

11-ше класс деч вара Бирск педагогический институтын биологий да химий факультетыштыже тунемын. Ирина чолга студент лийын: икымше курс гычак старостылан шогалтеныт, тӱрлӧ таҥасымашлаште вийжым терген. 

1998 ийыште дипломым налмек, шке ялысе школышто пашам ышташ тӱҥалын. Тудым вигак школ директорын воспитаний паша шотышто алмаштышыжлан шогалтеныт, тыгак химийым туныктен. 

Ирина Павловна школ пашажым сайын шуктен, но ик ий гыч кугу олаш илаш куснаш шонен пыштен. Тыге тудо, йот верыште нигӧм палыде, шкетынак Сургут олаш каен да пашам кычалаш тӱҥалын. Лачак 26-шо школышто химий ден биологийым туныктышо кӱлын. Тудлан 40 утла шагатым пуэныт да коррекционный класс вуйлатышылан шогалтеныт. Ирина лӱдде келшен. Икымше ий пашам ыштымыж годым школыштак илен, вес ийжылан тӱшкагудышто верым, а кумшо ийжылан посна пӧлемым ойыреныт. Тыге Ирина Сургут олаште «вожаҥын». 

Туныктымо пашаште йочам гына туныктыман огыл, шкеат эреак тунемман, тӱрлӧ конкурслаште участвоватлыман. Ирина Павловна пеш чулым да куштылго чонан айдеме улеш. Йоча-влакым экскурсийыш кондыштара, проект пашам намия - икманаш, йоча чоным почын, нунын дене кутырен, кылым кучен да тунемаш таратен мошта. 2006-шо ийыште икымше выпускым луктын. 2008-ше ий гыч биологий предметым гына намияш тӱҥалын. Тудо тӱрлӧ профсоюз таҥасымашлашкат коштеш.

Ирина Павловна - кӱшыл категориян тале туныктышо. 2015-ше ийыште «Мыйын туныктышем» оласе конкурсын финалистше лийын. 2016 ийыште «Идалыкын туныктышыжо» конкурсышто мастарлыкшым ончыктен. Кызыт «РСО Сургут» организацийын эковолонтержо улеш, куштырам посна погымо шотышто кугу пашам намия. Школышто йоча-влакым пӱртӱсым аралыме проект-влакыш ушен. Тунемшыже - Ханты-Мансийск автономный округысо окружной экологий конкурсын сеҥышыже. 

Ирина Павловна Сургут оласе «Батальон Мир» группа дене пырля СВО-лан полша. «Кызыт 109-ше маскировочный сетьым пидына. Окоп сортам шуко ыштена, моло семынат полшена», - манеш.

2023-шо ийыште И.П. Янсубаевам, шинчымашым пуымаште шумо сеҥымашыжым аклен, Ханты-Мансийск автономный округ - Югран образований да наука департаментшын Чап грамотыж дене палемденыт.

2024 ийыште Ирина Павловна «Сириус» образовательный рӱдерыште шинчымашым келгемдыме курсым эрташ йодмашым пуэн. Тушко каяш кугу конкурсым эрташ кӱлын. Ханты-Мансийск автономный округ гыч кум туныктышо гына логалын, а Россий гыч чылаже 40 еҥ лийын. И.П. Янсубаева тушто 18 гыч 26-шо май марте курсым эртен. 

«Сириусышто» тунемме деч вара у шӱлыш дене пашам ышташ кумылаҥат. Тушто шуко уым ужат да пален налат, моло туныктышо-влакын опытышт дене палыме лият, южышт дене кылым кучаш тӱҥалат. Мый кажне педагоглан тиде образовательный рӱдерыш логалаш тыланем», - ойла Ирина Павловна.

Тудо шке ялжымат огеш мондо. Кажне ийын аваж дек толын коштеш. Ялыште тӱшкан шуктышаш паша улмо годым вуйым огеш шупш, ялче-влак дене кылым кучен ила.