«Кидпашалан изинек шӱмаҥынам», - ойла тӱрлызӧ Лилия Имаева

«Мый изинек кидпашалан шӱмаҥынам, - ойла Мишкан селаште илыше Лилия. - Авам школышто тунеммем годымак име дене пидаш, крючоклаш, ырес дене тӱрлаш туныктыш. Ончыч име дене меж носким пидаш тунемым. Ешыштына кушшо вич икшывылан кажныланна икмыняр мужыр носки кӱлын. А авайлан мый гына пидаш полшен кертынам, вет эрге-влак коклаште ик ӱдыр гына улам. Варарак журнал ден книгаласе схема-влакым ончен пидаш тӱҥальым, шкаланем кофтым пидым. Моло тӱрлӧ кидпашамат ыштыл ончымо шуын - крючок дене салфеткым, шовычо мучашлан чылдарым, племянницем-влаклан тувырым пидам, лишыл еҥ-влаклан шочмо кечыштлан пӧлеклаш шовычым тӱрлем, чылдарым крючоклем ыле. 

Ешаҥмек да эрге-влак шочмек, шкаланна пӧртым чоҥымо годым тӱрлен шинчылташ жап лийын огыл. Ныл ий ончыч марий орнаментым тӱрлен ончаш шонен пыштышым. Тудо ийын Мишкан селам финн-угор тӱнян тӱвыра рӱдержылан ойырышт, да тидат мыняр-гынат мыйым книгалаште марий тӱр нерген возымым шымлаш, интернетыште вераҥдыме материал-влакым кычалтылаш таратыш». 

Мастарлык эркын-эркын шуаралтеш. Мыняр шукырак тӱрлет, тунар тӱр чаткарак да сылнырак лиеш. Тӱрлызын марий тӱран арверже: пылышкӧржшӧ, кулонжо-влак - моторланаш йӧратыше ӱдыр ден ӱдырамаш-влакланат келшат. 

Лилия суртыштыжо чылажымат жапыштыже ыштен шукташ да кидпашаланат пагытым муаш тырша. Тӱр дене сӧрастарыме арверже-влакым усталык выставкылаште, районысо мероприятий ден пайремлаштат ик гана веле огыл ончыктен. 

«Шке кид дене тӱрлымӧ мотор тӱрым ончен, шкежат пеш чот куанем. Тудо чоным лыпландара, ласкалыкым, куаным ешара», - манеш тудо. Йӧратен ыштыме арверже-влакым родо-шочшыжо ден палымыже-влакланат уло кумылын пӧлекла. Ончыкыланат шонымашыже ятыр. 

Лилия - сай озавате, суртыштыжо чылажат веран-верыштыже, йырым-йыр арулык озалана. Пӧртыштӧ, а кеҥежым сад-пакчаште шуко пеледышым, пакчасаскам ончен кушта. Теве тыгай шӧртньӧ кидан ӱдырамаш улеш.

Тудо канцелярийым вуйлата, кызытеш изи икшывыж дене мӧҥгыштӧ шинча. Владимир пелашыж дене коктын кум эргым - Максимым, Игорьым, Антоным да изи Екатеринам кугемдат. Ватыж гаяк шӧртньӧ кидан суртоза шке пашам шуктышо семын оформитлалтынат, мӧҥгыштӧ кучылтмо техникым да электроникым ачала.

Шуко шӧрынан, книгам лудаш йӧратыше озавате чеверласымына деч ончыч тыгай ойым каласыш: «Мыланем Рэй Брэдберин «451 градус по Фаренгейту» книгаж гыч тыгай цитата келша: «Мыйын кочам тыге ойла ыле: «Кажне еҥ шке почешыже мом-гынат кодышаш. Эргым, але книгам, картиным, але шке чоҥымо пӧртым, кеч кермыч гыч оптымо пырдыжым, але шке ургымо йолчиемым, шке шындыме садым. Кеч иктаж-мом, кушко илымет годым парнят-влак логалыныт, кушто колымет деч вара чонет шкаланже верым муэш. Еҥ-влакын тыйын куштымо пушеҥгым але пеледышым ончымо татыште тыят «илет». Мом ыштымет тӱҥ огыл, тӱҥжӧ - логалме арверет ончычсо формыжым алмаштен, тушто тыйынат могай-гынат пычырик ужашет аралалтеш. Тыштак пӧрт ончылно кушшо шудым тыглай гына солышо ден садым куштышо еҥ-влак кокласе ойыртемым ужына. Икымшыже эрта, да пуйто лийынат огыл, а садым ончен куштышо ик тукымым веле огыл ила».