Оҥай сӱретан рулетым ышта

Икана интернет тӱняште кулинар-влакын видеоканалыштым лаштыклыме годым рулетым ыштыме курс шинчашкыже пернен. Ыштен ончымеке, шкаланже путырак келшен. Тыге сӱретан рулетым кӱэштмаш шкешотан йӧратыме сомылышкыжо, хоббиш, савырнен. Мариян мутшо почеш, пашалан чыве муно, ложаш, сакыр, шинчал, тӱрлӧ крем кӱлыт. Рулетым сӧрастараш тудо «рисунок тестом» техника дене пайдалана. Сӱретым чиялташ пищевой красительым кучылтеш. «Иктаж оригинальный выпечкым ыштымем шуо. Кызыт бенто-торт-влакым ыштылыт. Мом чылан кӱэштыт, тудо оҥай огыл: почешышт ыштыме гай. А сӱретан рулет-влак мотор веле огыл, эше пешат тамле улыт. Адакшым ойыртемалтшын, сӧралын койыт. Кремжым (кӧргыжӧ) тӱрлым - ӱмбалым, емыжым, чиз-кремым - оптем. Бисквитшат кеч-могай - мӱян, шоколадан, ванилян, кешыран - лийын кертеш. Но ванилян бисквитше сайрак. Весела сӱретан рулет дене ешемым веле огыл, йолташем, родо-шочшем-влакымат сийлем. Сӧрал коробкыш пыштен, кӧстенеч шотеш кучыкташат кумылло», - ойла усталык шӱлышан туныктышо. 

Яра жап лийме годым чонлан лишыл ала-могай оҥай да пайдале сомылланат тунемаш лиеш. Кумылет веле лийже.