Ковам дене кугешнем

Ковам, Галина Ильинична Галеева (Петрова), Краснокам районысо Шушнур (Сӱзлӧ) ялеш 1956 ий 9 февралеш шуко йочан ешеш шочын. Ачаже ден аваже пашам йӧратыше лийыныт. Икшывыштымат пашалан туныктен куштеныт. Ачаже - Илья Петрович Петров - «1 май» колхозышто тӱҥ бухгалтерлан, аваже - Зинаида Ивановна Петрова - Шушнурысо нефтепаркын столовыйыштыжо поварлан ыштеныт. Ешыштышт 5 ӱдырым да 1 эргым куштеныт. Галя эн кугу лийын. Ковамын шарнен ойлымыж гыч палем, йоча жапше моло-влакын деч ойыртемалтын огыл. 

Шым ийым темымек, 1963 ийыште 1 классыш тунемаш каен. Школыш йывыртен коштын, сайын тунемын. Кандашымше класс деч вара Благовещенск педучилищыш тунемаш пурен. Дипломым налмек, Дӧртыльӧ районыш пашам ышташ толын. Паша книгаштыже кок корно веле: 

1975 ий - Искуш тӱҥалтыш школышто туныкташ тӱҥалын;

2011 ий - Искуш тӱҥалтыш школ петыралтмек, паша гыч каен.

Ковам 36 ий Искуш тӱҥалтыш школын вуйлатышыже да тӱҥалтыш класс-влакын туныктышышт лийын. 36 классым луктын, 300 утла йочам туныктен.

Тунемшыже-влак шукышт кӱшыл шинчымашым налыныт. Коклаштышт тӱрлӧ профессиян еҥ-влак улыт: туныктышо, врач, юрист, инженер-влак. Ковам ӱшана, шукышт тудын туныктымыжым: тӱрыслыкым, пашам шуктен ыштымым, икте-весылан полшымым - монден огытыл. Тудын кум тунемшыже кыдалаш школым ший медаль дене пытарен.

Паша лектышыже сай лиймылан ковамым Чап грамота-влак дене палемденыт, шуко ий пашам ыштымыжлан 2000 ийыште «Паша ветеран» лӱмым пуэныт. Но тудо йоча-влакын да ача-аваштын таумутыштым эн кугу наградылан шотла.

Илышыште порылыклан, сай айдеме лияш туныктышо еҥым вашлияш - кугу пиал. Икымше туныктышат тыгай сомылым шукта. Йоча-влакым йӧратымаш, нуным пагалымаш, шке сай примерым ончыктымаш - тудын тӱҥ качествыже-влак. Чылажат тиде мыйын ковамын уло. Тау, ковай! Мый тый денет кугешнем!