Тамле кочкышым ышта

- Елена, лудшына-влаклан шкендан нерген изишак каласкалыза.

- Мый Мишкан районысо Нерге ялыште илем. Ончыч Мишканыште технологлан пашам ыштенам, йочасадыште, школышто кузе пукшымым терген коштынам. Вара Уфа, Бирск олаласе пекарньыште, Мишкан селаште поварлан ыштенам. Ынде Нерге школышто повар улам. Чумыр стажем 27 ийыш погына.

- Кызыт те яра жапыште шылым, коям да молымат коптитледа. Кузе тендан тыгай шонымаш шочын?

- Ӱдырамаш-влакын кажне кечын кочкаш мом ямдылыме шотышто йодыш лектеш. Эре ик кочкышым шолтымо да кочмо ок шу, шыл деч посна тамле ок чуч. Молан тудым коптитлен ончаш огыл - тыгай шонымаш вуйышкем толын пурыш. Ялче-влакын шыл эре уло. Олаш каен, коптитлыме коҥгам нальым. Эн ончыч коям ешемлан ыштен ончышым. Келшыш. Вара сӧсна, чыве шылым, колым коптитлаш, икмыняр жап гыч еҥ-влак йодмо почеш ышташ тӱҥальым.

- Кочкыш тамле лийже манын, иктаж-могай секретдат уло? 

- Кеч-могай пашам «Тыгат йӧра» манын ыштет гын, тудо нигунам сайын ок лек. Мый уло чон дене ыштем, тамле лийже манын шонем. Эн тӱҥжӧ - маринадым ыштен моштыман. А могай секретем уло, тидын нерген ом каласе (воштылеш). 

- Елена, тугеже эше ик шонымашетым шуктенат. Мый палем, те яра жапыштыда эше массажым ыштеда. 

- Туге. Бирск олаште шӱргылан массажым ышташ курсым эртышым. «Скульптурно-буккальный массаж лица» маналтеш. Тыгай массажлан кӧра икымше сеанс гыч куптыр иземеш, шӱргысӧ чогашыл пеҥгыдемеш, кӱпнымыжӧ пыта.  

- Елена, шылымат коптитледа, массажымат, пашамат ыштеда. Кузе чыла вере шуыда?

- Кызытсе илышыште тыгай лийман. Мӧҥгыштӧ йогыланен кийыме дене нимогай сайжат уке. Чыла шергештеш, пашадарым огыт кӱзыктӧ. Тыге гына шӱкалтышым ышташ лиеш. Маскамат кушташ туныктат маныт, молан мыланнат, тунемын, ешартыш оксам ышташ огыл? Эре ончылно лийман. Шке пӱрымашнам ме шке гына чоҥена.